ಕೃಷಿಕನ ಮೇಲೆ ತಲವಾರು ದಾಳಿ

ವಂಡ್ಸೆ: ಗ್ರಾಮದ ಅಬ್ಬಿ ತೆಂಕೂಡಿಗೆ ಎಂಬಲ್ಲಿ ಸೋಮವಾರ ರಾತ್ರಿ ಕೃಷಿಕ ಆನಂದ ಶೆಟ್ಟಿ(60) ಎಂಬವರ ಮೇಲೆ ದುಷ್ಕರ್ಮಿಗಳು ದಾಳಿ ನಡೆಸಿದ್ದು ತಲವಾರಿನಿಂದ ಮಾರಣಾಂತಿಕ ಹಲ್ಲೆ ನಡೆಸಿದ್ದಾರೆ. ಶೆಟ್ಟಿ ಅವರ ತಲೆ ಚಿಪ್ಪು, ಮುಖ ಸೀಳಿ ಹೋಗಿದ್ದು ಉಡುಪಿ ಖಾಸಗಿ ಆಸ್ಪತ್ರೆಯಲ್ಲಿ ಅವರು ಜೀವನ್ಮರಣ ಹೋರಾಟ ನಡೆಸುತ್ತಿದ್ದಾರೆ. 

ಕೃಷಿಕರಾಗಿರುವ ಆನಂದ ಶೆಟ್ಟಿ ಎಂದಿನಂತೆ ಪೇಟೆಗೆ ಬಂದು ರಾತ್ರಿ 9ರ ಸುಮಾರಿಗೆ ಮನೆಯತ್ತ ಸಾಗುತ್ತಿರುವಾಗ ಮನೆಯಿಂದ ಸ್ವಲ್ಪ ದೂರದಲ್ಲಿ ನಾಲ್ವರು ರಬ್ಬರ್ ಪ್ಲ್ಯಾಂಟೇಶನ್ ಸಮೀಪ ಅಡ್ಡಗಟ್ಟಿ ತಲವಾರು ಬೀಸಿದ್ದಾರೆ. ತಲೆ, ಮುಖ, ಕುತ್ತಿಗೆ, ಬೆನ್ನಿಗೆ ಗಾಯಗೊಂಡು ನೆಲಕ್ಕೊರಗಿದ ಆನಂದ ಶೆಟ್ಟಿ ಸತ್ತಿರಬಹುದೆಂದು ಭಾವಿಸಿ ದುಷ್ಕರ್ಮಿಗಳು ಅಲ್ಲಿಂದ ತೆರಳಿರುವ ಸಾಧ್ಯತೆಗಳಿವೆ. 

ರಾತ್ರಿ 10.30ರ ಸುಮಾರಿಗೆ ಗಂಭೀರ ಗಾಯಗಳೊಂದಿಗೆ ಆನಂದ ಶೆಟ್ಟಿ ಕಷ್ಟಪಟ್ಟು ಮನೆಯಂಗಳಕ್ಕೆ ಬಂದು ಪ್ರಜ್ಞೆ ತಪ್ಪಿ ಬಿದ್ದರು. ತಕ್ಷಣ ಮನೆಯವರು ಕುಂದಾಪುರ ಖಾಸಗಿ ಆಸ್ಪತ್ರೆಗೆ ಕೊಂಡೊಯ್ದು ಅಲ್ಲಿಂದ ಹೆಚ್ಚಿನ ಚಿಕಿತ್ಸೆಗಾಗಿ ಉಡುಪಿ ಆದರ್ಶ ಆಸ್ಪತ್ರೆಗೆ ದಾಖಲಿಸಿದ್ದಾರೆ. 

ಆರೋಪಿಗಳ ಶೋಧ: ಮಹೇಶ್ ಗಾಣಿಗ, ಸಿ.ಡಿ.ಮಂಜು ಇನ್ನಿತರರು ತಲವಾರಿನಿಂದ ಕಡಿದಿರುವುದಾಗಿ ಆನಂದ ಶೆಟ್ಟಿ ಪೊಲೀಸರಿಗೆ ಹೇಳಿಕೆ ನೀಡಿದ್ದು ಗಾಯಾಳು ಹೇಳಿಕೆ ಆಧರಿಸಿ ಕೊಲ್ಲೂರು ಪಿಎಸ್‌ಐ ಜಯಂತ್ ಕೊಲೆ ಯತ್ನ ಪ್ರಕರಣ ದಾಖಲಿಸಿ ಆರೋಪಿಗಳ ಪತ್ತೆಗೆ ಬಲೆ ಬೀಸಿದ್ದಾರೆ. ಆನಂದ ಶೆಟ್ಟರಿಗೂ ಅವರು ಹೆಸರಿಸಿರುವ ವ್ಯಕ್ತಿಗಳಿಗೂ ಹಿಂದೆ ಉತ್ತಮ ಬಾಂಧವ್ಯವಿತ್ತಾದರೂ ಬಳಿಕ ವ್ಯವಹಾರದ ಹಿನ್ನೆಲೆಯಲ್ಲಿ ಮನಸ್ತಾಪ ಉಂಟಾಗಿತ್ತು ಎನ್ನಲಾಗಿದೆ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com