ಅಪಾಯಕ್ಕೆ ಸಿಲುಕಿದ್ದ ಮೀನುಗಾರರ ರಕ್ಷಣೆ

ಕೋಡಿ: ಮೀನುಗಾರಿಕೆಗೆ ತೆರಳಿ ವಾಪಸಾಗುತ್ತಿದ್ದ ದೋಣಿಯ ಎಂಜಿನ್ ಕೈಕೊಟ್ಟಿದ್ದರಿಂದ ಅಪಾಯಕ್ಕೆ ಸಿಲುಕಿದ್ದ 13 ಮಂದಿ ಮೀನುಗಾರರನ್ನು ಸ್ಥಳೀಯರು ರಕ್ಷಿಸಿದ ಘಟನೆ ಸೋಮವಾರ ಸಂಜೆ ಕೋಡಿಯಲ್ಲಿ ನಡೆದಿದೆ. 

ಘಟನೆಯ ವಿವರ: ಗಂಗೊಳ್ಳಿಯ ನಾಗರಾಜ ಖಾರ್ವಿ ಎಂಬವರಿಗೆ ಸೇರಿದ ದುರ್ಗಾಪರಮೇಶ್ವರಿ ಹೆಸರಿನ ನಾಡಾದೋಣಿಯಲ್ಲಿ 14 ಮಂದಿ ಮೀನುಗಾರರು ಸೋಮವಾರ ಬೆಳಗ್ಗೆ 10 ಗಂಟೆಗೆ ಸಮುದ್ರ ಮೀನುಗಾರಿಕೆಗೆ ತೆರಳಿದ್ದರು. ಮೀನುಗಾರಿಕೆ ಮುಗಿಸಿಕೊಂಡು ವಾಪಾಸಾಗುತ್ತಿರುವ ವೇಳೆ ಗಂಗೊಳ್ಳಿಯಿಂದ 12 ಮಾರು ದೂರದಲ್ಲಿ ದೋಣಿಯ ಎಂಜಿನ್ ಕೈಕೊಟ್ಟಿತ್ತು. ಅಲೆಗಳ ಹೊಡೆತ, ಭಾರಿ ಮಳೆಯಿಂದಾಗಿ ಮೀನುಗಾರರು ಕಂಗೆಟ್ಟಿದ್ದರು. ತೇಲುತ್ತಿರುವ ದೋಣಿಯನ್ನು ಗಟ್ಟಿಯಾಗಿ ಹಿಡಿದುಕೊಂಡಿದ್ದ ಮೀನುಗಾರರು ಯಾವುದೇ ಕ್ಷಣ ಸಮುದ್ರಪಾಲಾಗುವ ಸನ್ನಿವೇಶ ಎದುರಾಗಿತ್ತು. ದೋಣಿ ಅವಘಡಕ್ಕೆ ಸಿಲುಕಿದ ಮಾಹಿತಿ ಪಡೆದ ಕೋಡಿ ಹಾಯ್ಗುಳಿ ಫ್ರೆಂಡ್ಸ್ ಯುವಕರ ದಂಡು ಎಚ್ಚೆತ್ತುಕೊಂಡಿದ್ದರಿಂದ 14 ಮಂದಿ ಮೀನುಗಾರರು ಸುರಕ್ಷಿತವಾಗಿ ದಡ ಸೇರಿದ್ದಾರೆ. 

ಯುವಕರ ಸಾಹಸ: ಕೋಡಿ ಹ್ಯಾಗುಳಿ ಬಸ್ಸು ನಿಲ್ದಾಣದಿಂದ ಸುಮಾರು 4 ಮಾರು ಉದ್ದದ್ದ ಅಬ್ಬರದ ಕಡಲ ತೀರದಲ್ಲಿ ದೋಣಿ ತೇಲಿ ಬರುತ್ತಿರುವುದನ್ನು ಗಮನಿಸಿದ ಕೋಡಿ ಹ್ಯಾಗುಳಿ ಫ್ರೆಂಡ್ಸ್‌ನ ನಾಗೇಶ್ ಪೂಜಾರಿ, ವೆಂಕಟೇಶ ಪೂಜಾರಿ, ನಿತಿನ್ ಸ್ಥಳೀಯರ ಸಹಕಾರದೊಂದಿಗೆ ಇನ್ನೊಂದು ದೋಣಿ ಮೂಲಕ ಸಮುದ್ರಕ್ಕೆ ಸಾಗಿದ್ದು ಸಮುದ್ರದಲ್ಲಿ ತೇಲುತ್ತಿರುವ ದೋಣಿಗೆ ರೋಪ್ ತಲುಪಿಸುವುದರಲ್ಲಿ ಸಫಲತೆ ಕಂಡುಕೊಂಡಿದ್ದಾರೆ. ಅಲ್ಲದೆ ದಡದಲ್ಲಿದ್ದ ಸ್ಥಳೀಯರ ನೆರವಿನಿಂದ ಅಪಾಯಕ್ಕೆ ಸಿಲುಕಿದ್ದ ದೋಣಿಯನ್ನು ದಡಕ್ಕೆ ತರುವಲ್ಲಿ ಶ್ರಮಿಸಿದ್ದಾರೆ. 

ಸಂಕಷ್ಟದಿಂದ ಪಾರಾದ ಮೀನುಗಾರರ ವಿವರ: ನಾಗರಾಜ ಖಾರ್ವಿ, ಪ್ರಶಾಂತ್ ಖಾರ್ವಿ, ನಾಗೇಶ್ ಖಾರ್ವಿ, ಗೋವಿಂದ ಖಾರ್ವಿ, ಅಣ್ಣಪ್ಪ ಮೊಗವೀರ, ವಿಜಯ ಖಾರ್ವಿ, ನರಸಿಂಹ ಖಾರ್ವಿ, ದೇವು ಖಾರ್ವಿ, ಮಹೇಶ್ ಖಾರ್ವಿ, ಎ.ಪಿ.ನಾಗೇಶ್ ಖಾರ್ವಿ ನಾಯಕವಾಡಿ, ದಯಾನಂದ, ನವೀನ್, ಸುಬ್ರಹ್ಮಣ್ಯ, ಸಂತೋಷ್.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com