ಸ್ವಾಮೀಜಿ ಸೇರಿದಂತೆ ಗೋಸಾಗಾಟ ಮಾಡುತ್ತಿದ್ದ ಮೂವರ ಮೇಲೆ ಭೀಕರ ಹಲ್ಲೆ

ಕುಂದಾಪುರ: ಅಕ್ರಮವಾಗಿ ಗೋಸಾಗಾಟ ಮಾಡಲಾಗುತ್ತಿದೆ ಎಂಬ ನೆಲೆಯಲ್ಲಿ ಬುಧವಾರ ರಾತ್ರಿ 10.45ರ ಸುಮಾರಿಗೆ ಕೋಟೇಶ್ವರ ಬೈಪಾಸ್‌ನಲ್ಲಿ ಗುಂಪೊಂದು ವಾಹನ ಅಡ್ಡಗಟ್ಟಿ ಮೂವರ ಮೇಲೆ ತೀವ್ರವಾಗಿ ಹಲ್ಲೆ ನಡೆಸಿದೆ. ಘಟನೆಯಲ್ಲಿ ಸ್ವಾಮೀಜಿ ಸೇರಿದಂತೆ ಮೂವರು ಗಂಭೀರ ಗಾಯಗೊಂಡಿದ್ದಾರೆ. ಮೂವರನ್ನು ಪೊಲೀಸರ ನೆರವಿನಿಂದ ಕುಂದಾಪುರ ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. 

ಘಟನೆಯ ವಿವರ: ರಾತ್ರಿ 10.45ರ ಸುಮಾರಿಗೆ ಕೋಟೇಶ್ವರ ಬೈಪಾಸ್ ಸಮೀಪ ಮೊಗವೀರ ಲಂಚ್‌ಹೋಮ್ ಎದುರುಗಡೆ ರಾಷ್ಟ್ರೀಯ ಹೆದ್ದಾರಿಯಲ್ಲಿ ಈಚರ್ ವಾಹನ ಅಡ್ಡಗಟ್ಟಿದ ಗುಂಪು ವಾಹನದಲ್ಲಿ ದನಗಳ್ಳತನ ಮಾಡಿಕೊಂಡು ಸಾಗಿಸುತ್ತಿದ್ದೀರಾ ಎಂಬ ಬೊಬ್ಬೆ ಹೊಡೆದು ವಾಹನದಲ್ಲಿದ್ದವರನ್ನು ಕೆಳಗಿಳಿಸಿ ತೀವ್ರವಾಗಿ ಥಳಿಸಿದ್ದಾರೆ. ಹಲ್ಲೆಯ ಸುದ್ದಿ ತಿಳಿದು ಪೊಲೀಸರು ಸ್ಥಳಕ್ಕೆ ಧಾವಿಸುವಷ್ಟರಲ್ಲಿ ಗುಂಪು ಪಲಾಯನಗೈದಿದೆ. 

ರಕ್ತದ ಮಡುವಿನಲ್ಲಿ ಬಿದ್ದು ರಸ್ತೆಯಲ್ಲಿ ಹೊರಳಾಡುತ್ತಿದ್ದ ಮೂವರನ್ನು ಪೊಲೀಸರು ತಕ್ಷಣ ಸರಕಾರಿ ಆಸ್ಪತ್ರೆಗೆ ದಾಖಲಿಸಿ ಹೆಚ್ಚಿನ ಚಿಕಿತ್ಸೆಗಾಗಿ ಕುಂದಾಪುರ ಚಿನ್ಮಯಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ. ಹಲ್ಲೆಗೊಳಗಾದವರು ಕೇರಳ ಪಾಲಕ್ಕಡ್‌ನ ತಪೋವರಿಷ್ಠ ಆಶ್ರಮದ ಸ್ವಾಮೀಜಿ ಮೈಥಿಯೆ ಕಶ್ಯಪ್ (50), ಅವರ ಸಹವರ್ತಿಗಳಾದ ಜೋಸೆಫ್ (46) ಹಾಗೂ ಮೈಕಲ್(26) ಎಂದು ಗುರುತಿಸಲಾಗಿದೆ. ಮೂವರ ಸ್ಥಿತಿ ಗಂಭೀರವಾಗಿದ್ದು , ಶಸ್ತ್ರಚಿಕಿತ್ಸೆಗೊಳಪಡಿಸಲಾಗಿದೆ. ಕುಂದಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. 

ಆಶ್ರಮಕ್ಕೆ ಗೋಸಾಗಾಟ: ಕೊಲ್ಲೂರಿನ ಧರ್ಮಪೀಠ ಆಶ್ರಮದಿಂದ ಕೇರಳ ಪಾಲಕ್ಕಡ್‌ನ ಆಶ್ರಮಕ್ಕೆ ಗೋವು ಸಾಗಾಟ ಮಾಡುತ್ತಿದ್ದೆವು. ಗೋಸಾಗಾಟಕ್ಕೆ ಮೊದಲು ಕೊಲ್ಲೂರು ಗ್ರಾಮ ಪಂಚಾಯಿತಿ, ಕೊಲ್ಲೂರು ಪೊಲೀಸ್ ಠಾಣೆಯ ಒಪ್ಪಿಗೆ ಪತ್ರ ಪಡೆದುಕೊಂಡಿದ್ದೆವು. ಬುಧವಾರ ರಾತ್ರಿ 10.30ರ ಸುಮಾರಿಗೆ ಕೋಟೇಶ್ವರದಲ್ಲಿ ಗುಂಪು ವಾಹನ ತಡೆದು ನಿಲ್ಲಿಸಿ ಯಾವುದೇ ವಿಚಾರಣೆ ನಡೆಸದೆ ಏಕಾಏಕಿ ಹಲ್ಲೆ ನಡೆಸಿದೆ ಎಂದು ಗಾಯಗೊಂಡಿರುವ ಸ್ವಾಮೀಜಿ ಮೈಥಿಯೇ ಕಶ್ಯಪ್ ವಿಜಯ ಕರ್ನಾಟಕಕ್ಕೆ ತಿಳಿಸಿದ್ದಾರೆ. 

ಗೃಹ ಸಚಿವರಿಗೆ ದೂರು: ಪರವಾನಗಿ ಸಹಿತ ಗೋವು ಸಾಗಾಟ ಮಾಡುತ್ತಿದ್ದವರ ಮೇಲೆ ಅಮಾನುಷ ಹಲ್ಲೆ ನಡೆಸಿರುವ ಕ್ರಮವನ್ನು ಖಂಡಿಸಿರುವ ಬೈಂದೂರು ಶಾಸಕ, ಉಡುಪಿ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಕೆ. ಗೋಪಾಲ ಪೂಜಾರಿ ಈ ಬಗ್ಗೆ ಗಹ ಸಚಿವರಿಗೆ ದೂರು ನೀಡುವುದಾಗಿ ತಿಳಿಸಿದ್ದಾರೆ. 

ಗುರುವಾರ ಆಸ್ಪತ್ರೆಗೆ ಭೇಟಿ ನೀಡಿ ಗಾಯಾಳುಗಳ ಯೋಗಕ್ಷೇಮ ವಿಚಾರಿಸಿದ ಅವರು ವಿಕದೊಂದಿಗೆ ಮಾತನಾಡಿ, ಕೊಲ್ಲೂರು ಧರ್ಮಪೀಠ ಆಶ್ರಮದಿಂದ ಕೇರಳ ಪಾಲಕ್ಕಡ್‌ನ ಆಶ್ರಮಕ್ಕೆ ಹಸುಗಳನ್ನು ಸಾಗಿಸಲಾಗುತ್ತಿತ್ತು. ಗೋವುಗಳ ಸಾಗಾಟ ಪರವಾನಗಿಯನ್ನು ಪಡೆದುಕೊಳ್ಳಲಾಗಿದೆ. ಯಾವಾಗಲೂ ಪಾಲಕ್ಕಡ್‌ನ ಗೋಶಾಲೆಗೆ ಗೋವುಗಳನ್ನು ಸಾಗಿಸಲಾಗುತ್ತಿದೆ. ಯಾವುದೇ ವಿಚಾರ ವಿಮರ್ಶೆ ನಡೆಸದೆ ದುಷ್ಕರ್ಮಿಗಳು ಸ್ವಾಮೀಜಿ ಸೇರಿದಂತೆ ಮೂವರು ಅಮಾಯಕರ ಮೇಲೆ ಅಮಾನುಷ ದೌರ್ಜನ್ಯ ಎಸಗಿದ್ದಾರೆ. ಜಿಲ್ಲೆಯಲ್ಲಿ ಕಾನೂನು ಸುವ್ಯವಸ್ಥೆ ಸಂಪೂರ್ಣ ಹದಗೆಟ್ಟಿರುವುದಕ್ಕೆ ಈ ಘಟನೆಯೇ ಸಾಕ್ಷಿ. 

ಗೋಸಾಗಾಟ ವಿಷಯದಲ್ಲಿ ಕೆಲವೊಂದು ಸಂಘಟನೆಗಳು ನಡೆಸುತ್ತಿರುವ ಅಮಾನುಷ ಕತ್ಯವಿದು. ಘಟನೆಯ ಬಗ್ಗೆ ಗಹ ಸಚಿವರಿಗೆ ದೂರು ನೀಡಲಾಗುವುದು. ಸದನದಲ್ಲಿ ಧ್ವನಿಯೆತ್ತಲಾಗುವುದು. ದುಷ್ಕೃತ್ಯ ಎಸಗಿದವರ ವಿರುದ್ಧ ಕಠಿಣ ಕ್ರಮ ಜರುಗಿಸಬೇಕು ಮತ್ತು ಅವರನ್ನು ತಕ್ಷಣ ಬಂಧಿಸಬೇಕು ಎಂದು ಅವರು ಆಗ್ರಹಿಸಿದರು.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com