ಉಪ ಖಜಾನೆ ಎಸ್‌ಡಿಎ ಲೋಕಾಯುಕ್ತ ಬಲೆಗೆ

ಕುಂದಾಪುರ: ಸೇವೆಯಿಂದ ನಿವೃತ್ತರಾದ ಸಹ ಶಿಕ್ಷಕಿಯೊಬ್ಬರಿಗೆ ಪಿಂಚಣಿ ಚೆಕ್ ನೀಡಲು ಲಂಚ ನೀಡಬೇಕೆಂದು ಬೇಡಿಕೆ ಮುಂದಿಟ್ಟ ಕುಂದಾಪುರ ಉಪ ಖಜಾನಾಧಿಕಾರಿ ಕಚೇರಿಯ ಎಸ್‌ಡಿಎ ಸದಾನಂದ ಶನಿವಾರ ಲೋಕಾಯುಕ್ತ ಬಲೆಗೆ ಬಿದ್ದಿದ್ದಾರೆ. 

ಮಧ್ಯಾಹ್ನ ದಾಳಿ ನಡೆಸಿದ ಉಡುಪಿ ಲೋಕಾಯುಕ್ತ ಪೊಲೀಸರು ಸಹ ಶಿಕ್ಷಕಿಯಿಂದ ಲಂಚ ಸ್ವೀಕರಿಸುತ್ತಿದ್ದ ವೇಳೆ ಬಂಧಿಸಿದ್ದಾರೆ. ಬಂಧಿತ ಆರೋಪಿ ವಿರುದ್ಧ ಭ್ರಷ್ಟಾಚಾರ ಕಾಯಿದೆ ಕಲಂ 7, 13(1), 13(2)ರ ಪ್ರಕಾರ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. 

ಪ್ರಕರಣದ ವಿವರ: ಕೋಡಿ ಸೋನ್ಸ್ ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಸಹ ಶಿಕ್ಷಕಿಯಾಗಿದ್ದ ಐರಿನ್ ಸಹದೇವಿ 2014ರ ಫೆ.28ರಂದು ಸೇವೆಯಿಂದ ನಿವೃತ್ತರಾಗಿದ್ದರು. ನಿವೃತ್ತಿ ವೇತನ ಸೌಲಭ್ಯ ಪಡೆಯಲು ಏ. 25ರಂದು ಉಪ ಖಜಾನಾಧಿಕಾರಿಗೆ ಕಚೇರಿಗೆ ಹೋಗಿ ಖಜಾನೆಯಿಂದ ಗ್ರಾಚ್ಯುಟಿ ಫಂಡ್‌ನ 5,96,370 ರೂ.ನ 1 ಚೆಕ್, ಕಮಿಟೇಶನ್ ಫಂಡ್‌ನ 5,01,600 ರೂ.ನ 1 ಚೆಕ್, ಮಾರ್ಚ್ ತಿಂಗಳ ಪೆನ್ಶನ್ ಹಣ 18,393 ರೂ.ನ 1 ಚೆಕ್ ಹೀಗೆ ಒಟ್ಟು 3 ಚೆಕ್ ಪಡೆದುಕೊಂಡಿದ್ದು, ಬಳಿಕ ಏಪ್ರಿಲ್ ತಿಂಗಳ ಪೆನ್ಶನ್ ಚೆಕ್ ಬಗ್ಗೆ ವಿಚಾರಿಸಿದಾಗ ಸದಾನಂದ ಚೆಕ್ ನೀಡಲು 5 ಸಾವಿರ ರೂ. ನೀಡಬೇಕು ಎಂದು ಬೇಡಿಕೆ ಮುಂದಿಟ್ಟಿದ್ದರು. 

ಹಣ ನೀಡದಿದ್ದರೆ ಚೆಕ್ ನೀಡಲು ಕಷ್ಟ ಎಂಬರ್ಥದಲ್ಲಿ ಮಾನಸಿಕವಾಗಿ ನೋಯಿಸಿದ್ದರು. ಇದರಿಂದ ನೊಂದ ನಿವೃತ್ತ ಸಹ ಶಿಕ್ಷಕಿ ಐರಿನ್ ಸಹದೇವಿ ಉಡುಪಿ ಲೋಕಾಯುಕ್ತರಿಗೆ ದೂರು ನೀಡಿದ್ದರು. ಎಸ್‌ಡಿಎ ಸದಾನಂದ ಲಂಚ ಬೇಡಿಕೆ ಇಟ್ಟ ದಾಖಲೆಯೊಂದಿಗೆ ಶನಿವಾರ ಮಧ್ಯಾಹ್ನ ದಾಳಿ ನಡೆಸಿದ ಲೋಕಾಯುಕ್ತ ಪೊಲೀಸರು ಪಿಂಚಣಿ ಚೆಕ್‌ಗೋಸ್ಕರ 5 ಸಾವಿರ ಪಡೆಯುತ್ತಿರುವ ವೇಳೆ ಬಂಧಿಸಿದ್ದಾರೆ. 

ದಾಳಿಯ ನೇತೃತ್ವ: ಲೋಕಾಯುಕ್ತ ಉಡುಪಿ ಡಿವೈಎಸ್ಪಿ ಉಮೇಶ್ ಜಿ. ಶೇಟ್ ಮಾರ್ಗದರ್ಶನದಲ್ಲಿ ಲೋಕಾಯುಕ್ತ ಇನ್ಸ್‌ಪೆಕ್ಟರ್‌ಗಳಾದ ಮೋಹನ ಕೊಠಾರಿ, ಕೃಷ್ಣಾನಂದ ಜಿ. ನಾಯ್ಕ್, ಸಿಬ್ಬಂದಿಗಳಾದ ನಾಗೇಶ್ ಉಡುಪ, ದಿವಾಕರ ಶೆಟ್ಟಿ, ಶ್ರೀಧರ, ಶೋಭಾ, ರಿಯಾಜ್ ಅಹಮದ್, ಅಶೋಕ್, ಶಿವರಾಯ ಬಿಲ್ಲವ, ದಿನೇಶ್, ಲಕ್ಷ್ಮೀಧರ, ರಘುರಾಮ್, ಸತ್ಯವತಿ ದಾಳಿ ನಡೆಸಿದ್ದರು. 

ನ್ಯಾಯಾಂಗ ಬಂಧನ: ಬಂಧಿತ ಆರೋಪಿ ಸದಾನಂದ ಅವರನ್ನು ಶನಿವಾರ ಸಂಜೆ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು ನ್ಯಾಯಾಲಯ ಮೇ 16ರ ತನಕ ನ್ಯಾಯಾಂಗ ಬಂಧನ ವಿಧಿಸಿ ಆದೇಶಿಸಿದೆ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com