ಸಾಸ್ತಾನ ಕಾರ್ಪ್ ಬ್ಯಾಂಕ್ ಎಟಿಎಂ ದರೋಡೆ: ಆರೋಪಿಗಳ ಬಂಧನ

ಕೋಟ: 2013ರ ಡಿಸೆಂಬರ್ 9ರಂದು ತಡರಾತ್ರಿ ಸಾಸ್ತಾನ ಪಾಂಡೇಶ್ವರದಲ್ಲಿನ ಕಾರ್ಪೊರೇಶನ್ ಬ್ಯಾಂಕ್‌ಗೆ ಸೇರಿದ ಎಟಿಎಂ ಯಂತ್ರದ ಹಣ ಕಳವಿಗೆ ಯತ್ನಿಸಿದವರನ್ನು ಬಂಧಿಸಲಾಗಿದ್ದು, ಶನಿವಾರ ಸ್ಥಳದ ಮಹಜರಿಗಾಗಿ ಆರೋಪಿಗಳನ್ನು ಸಾಸ್ತಾನದ ಕಾರ್ಪ್ ಬ್ಯಾಂಕ್‌ಗೆ ಕರೆ ತರಲಾಯಿತು. 

ಕೃಷ್ಣ ಸಾಲಿಗ್ರಾಮ (23), ಶ್ರೀನಾಥ್(26), ಅಶೋಕ್(29), ಚಂದ್ರ(25) ಬಂಧಿತರು. ಆರೋಪಿಗಳಾದ ಕೃಷ್ಣ ಸಾಲಿಗ್ರಾಮ ಸಮೀಪದ ಪಾರಂಪಳ್ಳಿಯವನಾಗಿದ್ದು, ಶ್ರೀನಾಥ್ ಸಾಸ್ತಾನ ಸಮೀಪದ ಗುಂಡ್ಮಿ ನಿವಾಸಿ. ಅಶೋಕ ಮತ್ತು ಚಂದ್ರ ಹಂಗಾರಕಟ್ಟೆಯ ನಿವಾಸಿ ಎನ್ನಲಾಗಿದೆ. 

ಘಟನೆಯ ವಿವರ: 2013ರ ಡಿಸೆಂಬರ್ 9ರಂದು ತಡರಾತ್ರಿ ಎಟಿಎಂ ದರೋಡೆಗೆ ಬಂದ ಆರೋಪಿಗಳು ಮುಂಜಾಗ್ರತಾ ಕ್ರಮವಾಗಿ ಭದ್ರತೆಗೆ ಅಳವಡಿಸಿದ ಸಿಸಿ ಕ್ಯಾಮೆರಾ, ಬ್ಯಾಂಕ್ ಎದುರಿನ ಟ್ಯೂಬ್‌ಲೈಟ್ ಹಾಗೂ ಎಟಿಎಂ ಯಂತ್ರವನ್ನು ಹಾನಿಗೊಳಿಸಿದ್ದರು. ಸಾಸ್ತಾನದ ನಿವಾಸಿ ಅರುಣ್ ಲೂಯಿಸ್ ಅವರು ಈ ಎಟಿಎಂಗೆ ಹಣ ಡ್ರಾ ಮಾಡಲು ಬಂದಾಗ ಎಟಿಎಂನ ರೋಲಿಂಗ್ ಶಟರ್ ಅರ್ಧಕ್ಕೆ ತೆರೆದಿದ್ದನ್ನು ಕಂಡು, ಪಕ್ಕದ ಅಂಗಡಿ ಮಾಲೀಕರಲ್ಲಿ ವಿಷಯ ತಿಳಿಸಿದರು. ತದ ನಂತರ ತಾವೇ ರೋಲಿಂಗ್ ಶಟರ್‌ನ್ನು ಎತ್ತಿ ನೋಡಿದಾಗ ದರೋಡೆ ಯತ್ನ ಬೆಳಕಿಗೆ ಬಂತು. 

ಕೂಡಲೇ ಎಟಿಎಂನ ಸಿಸಿ ಕ್ಯಾಮೆರಾ ತಜ್ಞರು ಘಟನಾ ಸ್ಥಳಕ್ಕೆ ಆಗಮಿಸಿದ್ದು, ಕ್ಯಾಮೆರಾದಲ್ಲಿರುವ ಚಿತ್ರ ಪರಿಶೀಲಿಸಿದಾಗ ಅಸ್ಪಷ್ಟ ಚಿತ್ರಗಳು ಗೋಚರವಾಗುವುದಲ್ಲದೆ, ಚಿತ್ರಗಳು ಜಂಪ್, ಜಂಪ್ ಅಗಿ ನೋಡಲಾಗದ ಸ್ಥಿತಿಯಲ್ಲಿತ್ತು. ಆದ ಕಾರಣ ಆರೋಪಿಗಳನ್ನು ಕೂಡಲೇ ಬಂಧಿಸಲು ಪೊಲೀಸರಿಂದ ಸಾಧ್ಯವಾಗಿಲ್ಲ. ಘಟನೆಯ ಉನ್ನತ ತನಿಖೆಗಾಗಿ ಘಟನಾ ಸ್ಥಳಕ್ಕೆ ಅಂದು ವಿಧ್ವಂಸಕ ಕೃತ್ಯಗಳ ಪತ್ತೆ ದಳ, ಬೆರಳಚ್ಚು ತಜ್ಞರು, ಶ್ವಾನದಳ ಆಗಮಿಸಿದ್ದು, ಸ್ಥಳ ತಪಾಸಣೆ ನಡೆಸಿದ ಶ್ವಾನದಳ ಎಟಿಎಂ ಸಮೀಪದ ಪಕ್ಕದ ರಸ್ತೆಯಲ್ಲಿ ರಾಡ್ ಒಂದನ್ನು ಪತ್ತೆ ಹಚ್ಚಿತು. 

ಆರೋಪಿಗಳು ಚೈನ್ ಕಳ್ಳರು: ಬಂಧಿತ ಆರೋಪಿಗಳು ಈ ಹಿಂದೆ ಸಣ್ಣಪುಟ್ಟ ಕಳ್ಳತನ ಮಾಡಿ ಜೀವನ ಸಾಗಿಸುತ್ತಿದ್ದರು. ಪ್ರತಿನಿತ್ಯ ಬೈಕ್‌ಗೆ 600ರಿಂದ 800 ರೂ.ವರೆಗೆ ಪೆಟ್ರೋಲ್ ಹಾಕಿ ಗ್ರಾಮೀಣ ಭಾಗದ ರಸ್ತೆಯಲ್ಲಿ ತಿರುಗಾಡಿ ಒಂಟಿ ಮಹಿಳೆಯರು ಬಂದಾಗ ಅವರಲ್ಲಿ ವಿಳಾಸವನ್ನು ಕೇಳುವ ನೆಪದಲ್ಲಿ ನಿಲ್ಲಿಸಿ, ಹಿಂದೆ ಕುಳಿತವ ಹೆಲ್ಮೆಟ್ ಅಥವಾ ಕಲ್ಲಿನಿಂದ ಅವರಿಗೆ ಹೊಡೆದು ಸರ ಇನ್ನಿತರ ಚಿನ್ನದ ವಸ್ತುಗಳನ್ನು ದೋಚುವ ಹವ್ಯಾಸವನ್ನು ಬೆಳೆಸಿಕೊಂಡಿದ್ದರು. 

ಎರಡು ತಿಂಗಳ ಹಿಂದಷ್ಟೆ ಆರೋಪಿಗಳು ಸಾಬರಕಟ್ಟೆ ಸಮೀಪದ ಕಾಜರಹಳ್ಳಿಯಲ್ಲಿ ಮುದುಕಿಯೊಬ್ಬಳನ್ನು ಹೊಡೆದು ಕಿವಿಯನ್ನೇ ಕತ್ತರಿಸಿ ಚಿನ್ನಾಭರಣವನ್ನು ದೋಚಿದ್ದರು. ಬಿದ್ಕಲ್‌ಕಟ್ಟೆ ಹಾಗೂ ನೇರಳಕಟ್ಟೆಯಲ್ಲೂ ಸಹ ಚಿನ್ನದ ಸರವನ್ನು ಅಪಹರಿಸಿದ ಬಗ್ಗೆ ಠಾಣೆಯಲ್ಲಿ ಆರೋಪಿಗಳ ಕುರಿತು ದೂರು ದಾಖಲಾಗಿತ್ತು. 

ಎಟಿಎಂ ದರೋಡೆ ಬಯಲಾಗಿದ್ದು ಹೇಗೆ?: ಸಣ್ಣಪುಟ್ಟ ಕಳ್ಳತನ ಮಾಡಿದ ಆರೋಪಿಗಳು ಒಮ್ಮೆಲೆ ಶ್ರೀಮಂತರಾಗಬೇಕೆಂದು ಯೋಚಿಸಿ ಸಾಸ್ತಾನದ ಎಟಿಎಂ ದರೋಡೆಗೆ ಸ್ಕೆಚ್ ರೆಡಿ ಮಾಡಿದರು. ಅಶೋಕನ ಮನೆಯಲ್ಲಿ ಅಂದು ರಾತ್ರಿ ಊಟ ಪೂರೈಸಿ ಬಾರ್ ಒಂದರಲ್ಲಿ ಕುಡಿದು ಈ ಕೃತ್ಯಕ್ಕೆ ಸಿದ್ಧರಾದರು. 

ಆರೋಪಿ ಶ್ರೀನಾಥ್ ಮನೆಯಲ್ಲಿ ದನವನ್ನು ಮೇಯಲು ಕಟ್ಟುವ ರಾಡ್‌ನ್ನು ದರೋಡೆಗೆ ತಂದಿದ್ದ. ಮಾರುತಿ ಓಮ್ನಿಯಲ್ಲಿ ತಡರಾತ್ರಿ ಆರೋಪಿಗಳು ಬಂದು ಬ್ಯಾಂಕ್ ಸಮೀಪದಲ್ಲೇ ಇರುವ ಸಿರಿಯನ್ ಚರ್ಚ್‌ನ ವಠಾರದಲ್ಲಿ ಕಾರನ್ನು ನಿಲ್ಲಿಸಿ ಕೃತ್ಯಕ್ಕೆ ತೆರಳಿದ್ದು, ಚಾಲಕ ಚಂದ್ರ ಕಾರ್‌ನಲ್ಲೇ ಉಳಿದಿದ್ದ ಎನ್ನಲಾಗಿದೆ. ಎಟಿಎಂನ್ನು ಒಡೆಯಲು ಆರಂಭಿಸುತ್ತಿದ್ದಂತೆ ನಾಯಿ ಕೂಗಿದ ಸದ್ದನ್ನು ಕೇಳಿ ಕಾರು ನಿಲ್ಲಿಸಿದ ವಠಾರದ ಮನೆಯೊಂದರಲ್ಲಿ ಲೈಟ್ ಹಾಕಿದ ತಕ್ಷಣ ಕಾರಿನಲ್ಲಿದ್ದ ಆರೋಪಿ ಚಂದ್ರ ಕಾರಿನ ಲೈಟ್ ಆನ್ ಮಾಡಿದ್ದ. ತಕ್ಷಣ ಆರೋಪಿಗಳು ಯಾರೋ ಬಂದರೆಂದು ಭಾವಿಸಿ ರಾಡ್‌ನ್ನು ಅಲ್ಲೇ ಬಿಸಾಡಿ ಸ್ಥಳದಿಂದ ಕಾಲ್ಕಿತ್ತರು ಎನ್ನಲಾಗಿದೆ. 

ಸಿಕ್ಕಿ ಬಿದ್ದದ್ದು ಹೀಗೆ: ಕಾಜರಹಳ್ಳಿಯ ಸರಗಳ್ಳತನದ ಸಂದರ್ಭ ಬೈಕ್‌ನ ಅರ್ಧ ತುಂಡಾದ ನಂಬರ್ ಪ್ಲೇಟ್ ಕಾಜರಹಳ್ಳಿಯಲ್ಲಿ ಸಿಕ್ಕಿದ್ದು, ಆ ನಂಬರ್ ಪ್ಲೇಟ್‌ನ್ನು ಹಿಡಿದು ತನಿಖೆ ಆರಂಭಿಸಿದಾಗ ಈ ಎಲ್ಲ ಆರೋಪಿಗಳು ಬಂಧಿತರಾಗಿದ್ದಾರೆ. ತನಿಖೆ ಮುಂದುವರಿಸಿದಾಗ ಎಟಿಎಂ ದರೋಡೆಯನ್ನು ಸಹ ಬಾಯಿಬಿಟ್ಟರು ಎನ್ನಲಾಗಿದೆ. 

ಆರೋಪಿಗಳನ್ನು ಬಂಧಿಸುವಲ್ಲಿ ಉಡುಪಿ ಜಿಲ್ಲಾ ಪೊಲೀಸ್ ಅಧೀಕ್ಷಕ ಡಾ. ಬೋರಲಿಂಗಯ್ಯ, ಡಿವೈಎಸ್‌ಪಿ ಡಾ. ಪ್ರಭುದೇವ್ ಮಾನೆ ಅವರ ಮಾರ್ಗದರ್ಶನದಲ್ಲಿ ಬ್ರಹ್ಮಾವರ ಪೊಲೀಸ್ ವೃತ್ತ ನಿರೀಕ್ಷಕ ಅರುಣ್ ಬಿ. ನಾಯಕ್, ಬ್ರಹ್ಮಾವರ ಠಾಣಾಧಿಕಾರಿ ಗಿರೀಶ್, ಕೋಟ ಠಾಣಾಧಿಕಾರಿ ಕೆ.ಆರ್. ನಾಯಕ್, ಅಪರಾಧ ಪತ್ತೆ ದಳದ ಬಾಲಕೃಷ್ಣ, ಸುದೇಶ್, ಜೀವನ್, ಪ್ರಸಾದ್, ರಮೇಶ್, ಪ್ರಸನ್ನ ಮೊದಲಾದವರು ಸಹಕರಿಸಿದರು. 
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com