ಪಾಂಬೂರು ಬಾಲಕ ಸಲಿಂಗ ಕಾಮಕ್ಕೆ ಬಲಿ: ಆರೋಪಿ ಸೆರೆ

ಉಡುಪಿ: ನಿಗೂಢವಾಗಿ ನಾಪತ್ತೆಯಾಗಿ ಆನಂತರ ಮೃತಪಟ್ಟು ಅಸ್ಥಿ ಪಂಜರದ ಸ್ಥಿತಿಯಲ್ಲಿ ಪತ್ತೆಯಾಗಿ ಹಲವು ಊಹಾಪೋಹಕ್ಕೆ ಕಾರಣವಾದ ಪ್ರಕರಣವನ್ನು ಪೊಲೀಸರು ಭೇದಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಸಲಿಂಗ ಕಾಮಕ್ಕೆ ಬಳಸಿಕೊಂಡು ಕೊಲೆ ಮಾಡಿದ ಆರೋಪಿ, ಅಪ್ರಾಪ್ತ ತರುಣನನ್ನು ಬಂಧಿಸಿದ್ದಾರೆ. ಪಾಂಬೂರು 17ರ ಹರೆಯದ ಯುವಕ ಬಂಧಿತ ಆರೋಪಿ. ಪಾಂಬೂರು ಧರ್ಮಶ್ರೀ ನಿಲಯ ನಿವಾಸಿ ನಾಗರಾಜ ಅವರ ಮಗ ನವೀನ್ (5) ಬಲಿಯಾದ ಬಾಲಕ.

ಪ್ರಕರಣದ ಹಿನ್ನೆಲೆ: ನವೀನ್ ಕಳೆದ ಫೆಬ್ರವರಿ 23ರಂದು ಸಂಜೆ ಪಕ್ಕದ ಸ್ವಾಮಿನಾಥನ್ ಅವರ ಮನೆಗೆ ಟಿವಿ ನೋಡಲೆಂದು ಮನೆಯಿಂದ ಹೋದವ ನಾಪತ್ತೆಯಾಗಿದ್ದ. ಎಲ್ಲ ಕಡೆ ಹುಡುಕಾಡಿದರೂ ಪತ್ತೆಯಾಗಿರಲಿಲ್ಲ. ಮಾ. 24ರಂದು ನಾಗರಾಜ್ ಅವರು ತನ್ನ ಮಗನನ್ನು ಯಾರೋ ಅಪಹರಣ ಮಾಡಿದ್ದಾರೆ ಶಿರ್ವ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು.

ಮೂಲತಃ ತಮಿಳುನಾಡಿನವರಾದ ಕಲ್ಲಿನಕೋರೆ ಕೆಲಸ ಮಾಡುವ ಹಲವು ಕುಟುಂಬಗಳು ಎರಡು ದಶಕಗಳಿಂದ ಪಾಂಬೂರಲ್ಲಿ ವಾಸವಾಗಿವೆ. ನಾಗರಾಜ್ ಮತ್ತು ಆಶಾ ದಂಪತಿ ಕುಟುಂಬ ಕೂಡಾ ಇವುಗಳಲ್ಲಿ ಒಂದು. ನವೀನ್ ನಾಪತ್ತೆಯಾದ ದಿನದಿಂದ ಮೂರು ದಿನ 200ಕ್ಕೂ ಅಧಿಕ ಇರುವ ಕಲ್ಲಿನ ಕೋರೆ ಕಾರ್ಮಿಕರು ರಜೆ ಮಾಡಿ ಮೂರು ದಿನ ಹುಡುಕಾಡಿದ್ದರು. ಪೊಲೀಸರು ಆರಂಭದಲ್ಲಿ ಎರಡು ತಂಡ ಮಾಡಿ, ಆನಂತರ ನಾಲ್ಕು ತಂಡ ಮಾಡಿ ಹುಡುಕಾಟ ನಡೆಸಿದ್ದರು. ಆದರೂ ಮಗು ಪತ್ತೆಯಾಗಿರಲಿಲ್ಲ.

ಮಾರ್ಚ್ 9ರಂದು ಬಹಿರ್ದೆಸೆಗೆಂದು ಹೋದ ಪಕ್ಕದ ಮನೆ ಯುವಕನಿಗೆ ಬಾಲಕನ ತಲೆಬುರುಡೆ ಕಂಡು ಬಂದಿತ್ತು. ಸುತ್ತಮುತ್ತ ಮಗುವಿನ ಬಟ್ಟೆ, ಮೂಳೆಗಳು, ಚಪ್ಪಲಿ ಕಂಡು ಬಂದಿತ್ತು. ಮನೆಯಿಂದ ಮುಕ್ಕಾಲು ಕಿಲೋಮೀಟರ್ ದೂರದಲ್ಲಿಯೇ ಪತ್ತೆಯಾಗಿರುವುದು ಆಶ್ಚರ್ಯ ತಂದಿತ್ತು. ಪೊಲೀಸರು, ಶ್ವಾನದಳ, ವಿಧಿ ವಿಜ್ಞಾನ ತಜ್ಞರು, ಬೆರಳಚ್ಚು ತಜ್ಞರು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದರು. ಮಾದರಿಯನ್ನು ಮಣಿಪಾಲ ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಕಳುಹಿಸಿದ್ದರು. ಆವರೆಗೆ ಸುಮಾರು 40 ಮಂದಿಯ ವಿಚಾರಣೆ ನಡೆಸಿದ್ದರೂ ಆರೋಪಿ ಪತ್ತೆಯಾಗಿರಲಿಲ್ಲ.

ಆತ ಮಾಡಿದ್ದೇನು?: ಫೆಬ್ರವರಿ 23ರಂದು ಪಾಂಬೂರಲ್ಲಿ ಒಂದು ಕಾರ್ಯಕ್ರಮ ಇತ್ತು. ಪರಿಸರದ ಬಹುತೇಕ ಮಂದಿ ಈ ಕಾರ್ಯಕ್ರಮಕ್ಕೆ ತೆರಳಿದ್ದರು. ಈ ಬಾಲಕ ಸ್ವಾಮೀನಾಥನ್ ಮನೆಗೆ ಹೋಗುತ್ತಿರುವುದನ್ನು ನೋಡಿದ ಆರೋಪಿಯು ಬಾಲಕನಿಗೆ ಚಾಕಲೇಟ್ ಕೊಡುವುದಾಗಿ ಕರೆದು ಕೊಂಡು ಪಕ್ಕದ ಗುಡ್ಡಕ್ಕೆ ಹೋಗಿದ್ದಾನೆ. ಅಲ್ಲಿ ಮಗುವನ್ನು ಅಸ್ವಾಭಾವಿಕ ಲೈಂಗಿಕತೆಗೆ ಬಳಸಿಕೊಂಡಿದ್ದಾನೆ. ಮಗು ತನಗೆ ನೋವು ಮಾಡಿದ್ದನ್ನು ಮನೆಯಲ್ಲಿ ಹೇಳುವುದಾಗಿ ತಿಳಿಸಿದೆ. ಮಗು ಬಾಯಿ ಬಿಟ್ಟರೆ ತನ್ನ ಮರ್ಯಾದೆ ಹೋಗುತ್ತದೆ ಎಂದು ಭಾವಿಸಿದ ಆರೋಪಿ ಕಾಲಲ್ಲಿ ಮಗುವಿನ ಕಾಲನ್ನು ಒತ್ತಿ ಹಿಡಿದು, ಒಂದು ಕೈಯಲ್ಲಿ ಮಗುವಿನ ಎರಡೂ ಕೈಗಳನ್ನು ಹಿಡಿದುಕೊಂಡು ಇನ್ನೊಂದು ಕೈಯಲ್ಲಿ ಬಾಯಿ ಮೂಗನ್ನು ಒತ್ತಿ ಉಸಿರುಗಟ್ಟಿಸಿ ಕೊಲೆ ಮಾಡಿದ್ದಾನೆ. ಬಳಿಕ ಪೊದೆಯೊಂದರ ಒಳಗೆ ಹಾಕಿ ಏನೂ ಗೊತ್ತಿಲ್ಲದವರಂತೆ ಮನೆಗೆ ಬಂದಿದ್ದಾನೆ. ರಾತ್ರಿ 8 ಗಂಟೆ ಹೊತ್ತಿಗೆ ಮಗು ಇಲ್ಲ ಎಂದು ಎಲ್ಲರು ಹುಡುಕಾಡಿದಾಗ ಈತನೂ ಅವರ ಜತೆ ಸೇರಿಕೊಂಡು ಹುಡುಕಾಡಿದ್ದಾನೆ.

ಸಿಕ್ಕಿಬಿದ್ದಿದ್ದು ಹೇಗೆ?: ಬಾಲಕನ ಬುರುಡೆ ಪತ್ತೆಯಾದಾಗ ಪೊಲೀಸರು ಕೆಲವು ಆಯಾಮಗಳ ಬಗ್ಗೆ ತನಿಖೆ ನಡೆಸಿದ್ದರು. ವಾಮಾಚಾರಕ್ಕೆ ಬಲಿ, ಕಾಡುಪ್ರಾಣಿಗೆ ಬಲಿ, ಕುಟುಂಬ ವೈಷಮ್ಯಗಳ ಬಗ್ಗೆ ಪರಿಶೀಲನೆ ನಡೆಸಿದಾಗ ಯಾವುದಕ್ಕೂ ಪುರಾವೆಗಳು ಸಿಕ್ಕಿರಲಿಲ್ಲ.

ಆಗ ಬುರುಡೆ ಪತ್ತೆಯಾಯಿತು ಎಂದು ಪೊಲೀಸರಿಗೆ ಮಾಹಿತಿ ನೀಡಿದ ಯುವಕನನ್ನು ವಿಚಾರಿಸಿದ್ದಾರೆ. ಬುರುಡೆ ನೋಡುವ ಸಮಯದಲ್ಲಿ ತನ್ನೊಂದಿಗೆ ಆರೋಪಿ ಸುಜಯ್ (ಹೆಸರು ಬದಲಿಸಲಾಗಿದೆ) ಮತ್ತು ಇನ್ನೊಬ್ಬ ಇದ್ದರು ಎಂದು ಆತ ತಿಳಿಸಿದ್ದಾನೆ. ಈ ಮೂವರನ್ನೂ ಪೊಲೀಸರು ವಿಚಾರಣೆ ನಡೆಸಿದ್ದಾರೆ.

ಸುಜಯ ಒಂದು ವರ್ಷದ ಹಿಂದೆ ಸಲಿಂಗ ಕಾಮಕ್ಕಾಗಿ ಇದೇ ಬಾಲಕನೊಬ್ಬನನ್ನು ಬಳಸಿಕೊಂಡು ದೊಡ್ಡ ವಿವಾದವಾಗಿತ್ತು. ಆಗ ಈತನನ್ನು ಪಾಂಬೂರಿಂದ ಆತನ ಊರಾದ ತಮಿಳುನಾಡಿಗೆ ಕಳುಹಿಸಿಕೊಟ್ಟಿದ್ದರು. ಎರಡು ತಿಂಗಳ ಹಿಂದೆಯಷ್ಟೆ ಮತ್ತೆ ಊರಿಗೆ ಬಂದಿದ್ದ. ಪೊಲೀಸರಿಗೆ ಈ ವಿಚಾರ ಗೊತ್ತಾಗುತ್ತಿದ್ದಂತೆ ಆತನನ್ನು ಎತ್ತಾಕಿಕೊಂಡು ಹೋಗಿದ್ದರು. ಮೊದಲು ಬೇರೆ ಬೇರೆಯವರ ಹೆಸರು ಹೇಳಿ ತಪ್ಪಿಸಿಕೊಳ್ಳಲು ಯತ್ನಿಸಿದ್ದನಾದರೂ ಕೊನೆಗೆ ಒಪ್ಪಿಕೊಂಡಿದ್ದಾನೆ. ಆದರೆ ಆತ ಮೊದಲು ಹೆಸರಿಸಿದ ಯುವಕರೆಲ್ಲ 'ತೀವ್ರ' ವಿಚಾರಣೆಗೆ ವಿನಾಕಾರಣ ಒಳಗಾಗಬೇಕಾಯಿತು. ಎಸ್‌ಪಿ ಡಾ. ಬೋರಲಿಂಗಯ್ಯ ನಿರ್ದೇಶನದಲ್ಲಿ ಕಾರ್ಕಳ ಎಎಸ್‌ಪಿ ಅಣ್ಣಾಮಲೈ, ಕಾಪು ಇನ್‌ಸ್ಪೆಕ್ಟರ್ ಸುನಿಲ್ ನಾಯಕ್, ಶಿರ್ವಾ ಎಸ್‌ಐ ಅಶೋಕ್ ಮತ್ತು ಸಿಬ್ಬಂದಿ ಕಾರ್ಯಾಚರಣೆ ನಡೆಸುತ್ತಿದ್ದಾರೆ.

*ಆರೋಪಿಯನ್ನು ಪತ್ತೆ ಹಚ್ಚಲು ಹೆಚ್ಚು ಸುಳಿವುಗಳಿರಲಿಲ್ಲ. ಹೊರಗಿನಿಂದ ಬಂದವರಾಗಿದ್ದರೆ ಬಳಸಿದ ಮೊಬೈಲ್ ಇದ್ದ ಟವರ್ ಮೂಲಕ ಕಂಡು ಹಿಡಿಯಬಹುದಿತ್ತು. ಆದರೆ ಇಲ್ಲಿ ಯಾವುದೇ ಕ್ಲೂಗಳಿರಲಿಲ್ಲ. ಒಳಗಿನವರೇ ಈ ಕೃತ್ಯದಲ್ಲಿ ಪಾಲ್ಗೊಂಡಿದ್ದಾರೆ ಎಂಬ ಅನುಮಾನ ಇದ್ದರೂ ಯಾರು ಎಂಬುದು ಗೊತ್ತಾಗುತ್ತಿರಲಿಲ್ಲ. ಪ್ರತಿಯೊಬ್ಬರನ್ನು ವಿಚಾರಿಸಿ, ಅವರ ಹಿನ್ನೆಲೆ ನೋಡಬೇಕಾಯಿತು. ಅಸ್ವಾಭಾವಿಕ ಲೈಂಗಿಕತೆಗೆ ಸಂಬಂಧಿಸಿದಂತೆ ಹಲವು ಮಂದಿ ಈತನ ಬಗ್ಗೆ ಹೇಳಿದ್ದರು. ಹಾಗಾಗಿ ಪತ್ತೆ ಹಚ್ಚುವುದು ಸುಲಭವಾಯಿತು.
-ಡಾ. ಬೋರಲಿಂಗಯ್ಯ, ಎಸ್‌ಪಿ, ಉಡುಪಿ

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com