ಮಣಿಪಾಲ ಸಾಮೂಹಿಕ ಅತ್ಯಾಚಾರ ಪ್ರಕರಣ: ಜ.20ರ ಬಳಿಕ ವಿಚಾರಣೆ

ಉಡುಪಿ: ಮಣಿಪಾಲದ ವೈದ್ಯಕೀಯ ವಿದ್ಯಾರ್ಥಿನಿಯ ಸಾಮೂಹಿಕ ಲೈಂಗಿಕ ದೌರ್ಜನ್ಯ ಪ್ರಕರಣದ ಸಾಕ್ಷಿಗಳ ವಿಚಾರಣೆಯೂ ಜ.20ರ ಬಳಿಕ ನಡೆಯಲಿದೆ. ಮಂಗಳವಾರ ಮತ್ತು ಬುಧವಾರ ನಡೆಯಬೇಕಿದ್ದ ವಿಚಾರಣೆಯೂ ನ್ಯಾಯಾಧೀಶರು ರಜೆಯಲ್ಲಿ ಇರುವುದರಿಂದ ಮುಂದೂಡಲಾಗಿದೆ.

2013ರ ಜೂ.20ರಂದು ರಾತ್ರಿ ವೈದ್ಯಕೀಯ ವಿದ್ಯಾರ್ಥಿನಿಯನ್ನು ಆಟೋ ರಿಕ್ಷಾದಲ್ಲಿ ಅಪಹರಿಸಿ ಮೂವರು ಲೈಂಗಿಕ ದೌರ್ಜನ್ಯ ನಡೆಸಲಾಗಿತ್ತು. ಆರೋಪಿಗಳಾದ ಓಂತಿಬೆಟ್ಟು ಯೋಗೀಶ್, ಸಣ್ಣಕ್ಕಿಬೆಟ್ಟು ಹರಿಪ್ರಸಾದ್ ಮತ್ತು ಆನಂದರನ್ನು ಬಂಧಿಸಲಾಗಿತ್ತು. ಆನಂತರ ಸಾಕ್ಷ್ಯನಾಶ ಆರೋಪದಲ್ಲಿ ಯೋಗೀಶ್‌ನ ಸಹೋದರ ಬಾಲಚಂದ್ರ ಮತ್ತು ಹರಿಪ್ರಸಾದ್‌ನ ಸಹೋದರ ಹರೀಂದ್ರರನ್ನು ಬಂಧಿಸಲಾಗಿದ್ದು, ಅವರು ಇತ್ತೀಚೆಗೆ ಷರತ್ತು ಬದ್ಧ ಜಾಮೀನಿನಲ್ಲಿ ಬಿಡುಗಡೆಗೊಂಡಿದ್ದಾರೆ. 

ಈ ಪ್ರಕರಣದ ಸಾಕ್ಷಿಗಳ ವಿಚಾರಣೆ ಸೋಮವಾರ ಆರಂಭಗೊಂಡಿತ್ತು. ವಿದ್ಯಾರ್ಥಿನಿ ಮತ್ತು ಆಕೆಯ ರೂಂ ಮೇಟ್ ವಿದ್ಯಾರ್ಥಿನಿ ಪರೀಕ್ಷೆಯ ಕಾರಣದಿಂದ ವಿಚಾರಣೆಗೆ ಗೈರು ಹಾಜರಾಗಿದ್ದರು. ಮಣಿಪಾಲ ಎಸ್ಟೇಟ್ ಮ್ಯಾನೆಜರ್ ಜೈವಿಠಲ್ ಮತ್ತು ಭದ್ರತಾ ಸಿಬ್ಬಂದಿ ಸುರೇಶ್ ಸೋಮವಾರ ವಿಚಾರಣೆಗೆ ಹಾಜರಾಗಿದ್ದರು. ಮಂಗಳವಾರ ಮತ್ತು ಬುಧವಾರ ವಿಚಾರಣೆ ಮುಂದುವರಿಯಬೇಕಿತ್ತು. ಆದರೆ ಜಿಲ್ಲಾ ಮತ್ತು ಸತ್ರ ನ್ಯಾಯಾಧೀಶರು ರಜೆಯಲ್ಲಿ ತೆರಳಿರುವುದರಿಂದ ಮಂಗಳವಾರ ನಡೆಯಬೇಕಿದ್ದ ವಿಚಾರಣೆ ಜ.20ರಂದು ಹಾಗೂ ಬುಧವಾರ ನಡೆಯಬೇಕಿದ್ದ ವಿಚಾರಣೆ ಜ.21ರಂದು ನಡೆಯಲಿದೆ. 

ಮಂಗಳವಾರ ಮೂವರು ಪ್ರಮುಖ ಆರೋಪಿಗಳು ಮತ್ತು ಸಾಕ್ಷ್ಯನಾಶದ ಇಬ್ಬರು ಆರೋಪಿಗಳು ನ್ಯಾಯಾಲಯಕ್ಕೆ ಆಗಮಿಸಿದ್ದು, ಹೆಚ್ಚುವರಿ ನ್ಯಾಯಿಕ ದಂಡಾಧಿಕಾರಿಯವರು ಮುಂದಿನ ದಿನಾಂಕವನ್ನು ಸೂಚಿಸಿ ಕಳುಹಿಸಿದ್ದಾರೆ. ಯೋಗೀಶ, ಆನಂದ ಮತ್ತು ಹರಿಪ್ರಸಾದ್‌ರ ನ್ಯಾಯಾಂಗ ಬಂಧನ ಮುಂದುವರಿದಿದೆ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com