ಗಂಗೊಳ್ಳಿ : ಒಂದೇ ಕುಟುಂಬದ ನಾಲ್ವರ ಸಾವು

ಗಂಗೊಳ್ಳಿ : ಹಾಸನ ಜಿಲ್ಲೆಯ ಚನ್ನರಾಯಪಟ್ಟಣದ ಬರಗೂರು ಹ್ಯಾಂಡ್‌ಪೋಸ್ಟ್ ಬಳಿ ಬುಧವಾರ ರಾತ್ರಿ ಸಂಭವಿಸಿದ ಅಪಘಾತದಲ್ಲಿ ಗಂಗೊಳ್ಳಿ ಮೂಲದ ನಾಲ್ವರು ಮೃತಪಟ್ಟಿದ್ದು, ಊರೀಗ ಶೋಕಸಾಗರವಾಗಿದೆ. 

ಗಂಗೊಳ್ಳಿ ಚರ್ಚ್ ರಸ್ತೆಯ ನಿವಾಸಿ ಕ್ಲಿಫರ್ಡ್ ಫರ್ನಾಂಡಿಸ್ ಮತ್ತು ಜೆನೆಲಿವೋ ಫರ್ನಾಂಡಿಸ್ ಅವರ ಪುತ್ರ ಪ್ರದೀಪ್ (32), ಅವರ ಒಂದೂವರೆ ವರ್ಷದ ಮಗು ಜ್ಯೋತ್ಸ್ನಾ ಹಾಗೂ ಹತ್ತಿರದ ಸಂಬಂಧಿ ಸೋನಿ ಸ್ಥಳದಲ್ಲೇ ಮೃತಪಟ್ಟರೆ, ಗಂಭೀರ ಗಾಯಗೊಂಡಿದ್ದ ಫಿಲೋಮಿನಾ (25) ಬುಧವಾರ ರಾತ್ರಿ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದರು. ಫಿಲೋಮಿನಾ ಅವರು ಪ್ರದೀಪ್ ಪತ್ನಿ ಪ್ರಿಯಾ ಅವರ ಸೋದರಿ. ಪ್ರದೀಪ್ ಫರ್ನಾಂಡಿಸ್ ಅವರ ಪತ್ನಿ ಪ್ರಿಯಾ (28) ಮತ್ತು ಹತ್ತಿರದ ಸಂಬಂಧಿ ಕಾರು ಚಾಲಕರಾಗಿದ್ದ ವಿಜಯ ರೆಬೆಲ್ಲೋ ಉಪ್ಪಿನಕುದ್ರು (25) ಗಂಭೀರ ಗಾಯಗೊಂಡಿದ್ದು, ಅವರನ್ನು ಮಂಗಳೂರಿನ ಖಾಸಗಿ ಆಸ್ಪತ್ರೆಗೆ ಕರೆ ತರಲಾಗಿದೆ. ಗಂಗೊಳ್ಳಿಯ ಈ ಕುಟುಂಬ ಹೋಂಡಾ ಸಿಟಿ ಕಾರಿನಲ್ಲಿ ಪಯಣಿಸುತ್ತಿತ್ತು. 

ಘಟನೆಯಿಂದಾಗಿ ಗಂಗೊಳ್ಳಿ ಚರ್ಚ್ ರಸ್ತೆ ಮತ್ತು ಬಂದರು ಪ್ರದೇಶದಲ್ಲಿ ಶೋಕದ ವಾತಾವರಣ ನಿರ್ಮಾಣಗೊಂಡಿದ್ದು, ಪ್ರತಿಯೊಬ್ಬರ ಬಾಯಲ್ಲೂ ಅದೇ ಘಟನೆಯ ಚರ್ಚೆ ನಡೆಯುತ್ತಿದೆ. ಅಮಾವಾಸ್ಯೆ ದಿನವಾದ ಬುಧವಾರ ಹೊರಡುವುದು ಬೇಡ. ನಾಳೆ ಹೋಗಬಹುದು ಎಂದು ನೆರೆಕರೆಯವರು ವಿನಂತಿಸಿದ್ದರೂ ಕಂಪನಿ ಕರೆಯ ಹಿನ್ನೆಲೆಯಲ್ಲಿ ಪ್ರದೀಪ್ ತುರ್ತಾಗಿ ಹೊರಟಿದ್ದರು. 

ಕಳಚಿದ ಆಧಾರಸ್ತಂಭ: ಚರ್ಚ್ ರಸ್ತೆಯ ನಿವಾಸಿ ಕ್ಲಿಫರ್ಡ್ ಫರ್ನಾಂಡಿಸ್ ಮತ್ತು ಜೆನಿಲಿವೊ ಫರ್ನಾಂಡಿಸ್ ಅವರ ಮೂವರು ಮಕ್ಕಳಲ್ಲಿ ಪ್ರದೀಪ್ 2ನೆಯವರು. ಬಡತನದಲ್ಲಿ ಬೆಳೆದು ಬೆಂಗಳೂರಿನ ಐಟಿ ಕಂಪನಿಯೊಂದರಲ್ಲಿ ಉದ್ಯೋಗ ಪಡೆದು ಮನೆಗೆ ಆಧಾರವಾಗಿದ್ದರು. ಸ್ನೇಹ ಜೀವಿಯೂ ಆಗಿದ್ದ ಪ್ರದೀಪ್ ಮತ್ತು ಇತರರ ಸಾವಿನ ಸುದ್ದಿ ತಿಳಿದು ಗುರುವಾರ ನೂರಾರು ಸಂಖ್ಯೆಯಲ್ಲಿ ಜನ ಅವರ ಮನೆ ಮುಂದೆ ಜಮಾಯಿಸಿದ್ದರು. 

ಕ್ರಿಸ್ಮಸ್‌ಗೆ ಬಂದಿದ್ದರು: ಪ್ರದೀಪ್ ಕೆಲವು ವರ್ಷದ ಹಿಂದೆ ಗಂಗೊಳ್ಳಿ ಬಂದರು ನಿವಾಸಿ ಸೋಲೊಮನ್ ಲೋಬೊ ಮತ್ತು ಐರಿನ್ ಲೋಬೊ ಅವರ ಮಗಳು ಪ್ರಿಯಾ ಅವರನ್ನು ವರಿಸಿದ್ದರು. ಜ್ಯೋತ್ಸ್ನಾ ಅವರ ಮುದ್ದಾದ ಮಗು. ಉದ್ಯೋಗ ನಿಮಿತ್ತ ಬೆಂಗಳೂರಿನಲ್ಲೇ ನೆಲೆಸಿದ್ದ ಅವರು ಕ್ರಿಸ್ಮಸ್‌ಗಾಗಿ ಹತ್ತಿರದ ಬಂಧುಗಳೊಂದಿಗೆ ಊರಿಗೆ ಬಂದ್ದಿರು. 

ಅಪಘಾತಕ್ಕೀಡಾದ ಹೋಂಡಾ ಸಿಟಿ ಕಾರು ವಿಜಯ್ ರೆಬೆಲ್ಲೊ ಅವರದ್ದು. ಬೆಂಗಳೂರಿನಲ್ಲಿ ಉದ್ಯಮಿಯಾಗಿರುವ ವಿಜಯ್ ಅವರೇ ಯಾವಾಗಲೂ ಕಾರನ್ನು ಓಡಿಸುತ್ತಿದ್ದರು. ಬೆಂಗಳೂರಿಗೆ ಹೋಗುವಾಗ ನಡುಹಾದಿಯಲ್ಲಿ ಪ್ರದೀಪ್ ಕಾರು ಚಾಲನೆಗೆ ತೊಡಗಿಸಿಕೊಂಡಿದ್ದರು. 

ಇಂದು ಅಂತ್ಯಕ್ರಿಯೆ: ಮೃತದೇಹಗಳ ಮರಣೋತ್ತರ ಪರೀಕ್ಷೆ ನಡೆಸಿ ಗುರುವಾರ ಬೆಳಗ್ಗೆ ಹಾಸನದ ಆಸ್ಪತ್ರೆಯಿಂದ ಬಿಡುಗಡೆಗೊಳಿಸಲಾಗಿದ್ದು ಸಂಜೆ ವೇಳೆಗೆ ಗಂಗೊಳ್ಳಿ ತಲುಪಿದೆ. ಮತರ ಅಂತ್ಯವಿಧಿ ಜ.3ರಂದು ಸಂಜೆ 3 ಗಂಟೆಗೆ ಗಂಗೊಳ್ಳಿ ಇಗರ್ಜಿಯಲ್ಲಿ ನಡೆಯಲಿದೆ ಎಂದು ಕುಟುಂಬ ವರ್ಗ ತಿಳಿಸಿದೆ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com