ಬಂದರು ಇಲಾಖೆ ಅಧಿಕಾರಿ ಮನೆಗೆ ಲೋಕಾಯುಕ್ತ ದಾಳಿ

ಕುಂದಾಪುರ: ಖಚಿತ ಮಾಹಿತಿ ಮೇರೆಗೆ ಸರ್ಚ್ ವಾರಂಟ್‌ನೊಂದಿಗೆ ಲೋಕಾಯುಕ್ತ ತಂಡ ಶುಕ್ರವಾರ ಬೆಳಗ್ಗೆ ಇಲ್ಲಿನ ಬಂದರು ಇಲಾಖೆಯ ಸಹಾಯಕ ಕಾರ್ಯಪಾಲಕ ಎಂಜಿನಿಯರ್ ನಾರಾಯಣ ಖಾರ್ವಿ ಅವರ ಮನೆಗೆ ದಾಳಿ ನಡೆಸಿದ್ದು, 1 ಕೋಟಿ ರೂ.ಗೂ ಹೆಚ್ಚು ಅಕ್ರಮ ಆಸ್ತಿ ಸಂಪಾದನೆ ಪತ್ತೆಹಚ್ಚಿದೆ. 

ಲೋಕಾಯುಕ್ತ ಹಾಸನ ಎಸ್ಪಿ (ಮಂಗಳೂರು ಪ್ರಭಾರ) ವೇದಮೂರ್ತಿ ನೇತೃತ್ವದ ಲೋಕಾಯುಕ್ತ ತಂಡ ಶುಕ್ರವಾರ ಬೆಳಗ್ಗಿನ ಜಾವ 5 ಗಂಟೆಗೆ ಕುಂದಾಪುರ ತಲುಪಿದ್ದು ಅಲ್ಲಿಂದ ನೇರವಾಗಿ ಸರ್ಚ್ ಹಾಗೂ ಅರೆಸ್ಟ್ ವಾರಂಟ್‌ನೊಂದಿಗೆ ಕೋಟೇಶ್ವರ ಕಿನರಾ ಸಾಗುವ ರಸ್ತೆಯಲ್ಲಿರುವ ಚಿಪಾನಬೆಟ್ಟು ಎಂಬಲ್ಲಿ ನೆಲೆಸಿರುವ ಬಂದರು ಇಲಾಖೆ ಉಡುಪಿ ವಿಭಾಗದ ಸಹಾಯಕ ಕಾರ್ಯನಿರ್ವಾಹಕ ಎನ್. ನಾರಾಯಣ ಖಾರ್ವಿ (ಎನ್.ಎನ್. ಖಾರ್ವಿ)ಯವರ ಮನೆಗೆ ದಾಳಿ ನಡೆಸಿದೆ. ಬೆಳಗ್ಗಿನ ಜಾವ 6 ಗಂಟೆಗೆ ಮನೆಗೆ ದಾಳಿ ಇಟ್ಟ ಲೋಕಾಯುಕ್ತ ತಂಡ ನೇರವಾಗಿ ಮನೆಯವರಿಗೆ ವಿಷಯ ತಿಳಿಸಿ ಶೋಧ ಕಾರ್ಯ ನಡೆಸಿದೆ. 

ಈ ಸಂದರ್ಭ ಎನ್.ಎನ್. ಖಾರ್ವಿ ಮನೆಯಲ್ಲಿ ಇದ್ದಿರಲಿಲ್ಲ. ಅವರ ಪತ್ನಿ, ಮಗ, ಸೊಸೆ ಹಾಗೂ ತಾಯಿ ಲೋಕಾಯುಕ್ತ ತನಿಖೆಗೆ ಅನುವು ಮಾಡಿಕೊಟ್ಟರು. ಸಂಜೆ ತನಕವು ಶೋಧ ಕಾರ್ಯ ನಡೆದಿದ್ದು, ಅತ್ಯಮೂಲ್ಯ ದಾಖಲೆ ಸಹಿತ ಚಿನ್ನ, ಬೆಳ್ಳಿ ವಸ್ತುವನ್ನು ಲೋಕಾಯುಕ್ತ ತಂಡ ವಶಪಡಿಸಿಕೊಂಡಿದೆ. ಲೋಕಾಯುಕ್ತ ಉಡುಪಿ ಡಿವೈಎಸ್ಪಿ ಉಮೇಶ್ ಶೇಟ್, ಲೋಕಾಯುಕ್ತ ಇನ್‌ಸ್ಪೆಕ್ಟರ್‌ಗಳಾದ ಮೋಹನ್ ಕೊಠಾರಿ, ದಿಲೀಪ್ ಕುಮಾರ್, ಮಂಗಳೂರು ಲೋಕಾಯುಕ್ತ ಸಿಬ್ಬಂದಿಗಳಾದ ಸುದರ್ಶನ್, ಶರಣ್, ಅಬ್ದುಲ್ ಸಲೀಂ, ಲೋಕೇಶ್, ಉಡುಪಿ ಲೋಕಾಯುಕ್ತ ಸಿಬ್ಬಂದಿಗಳಾದ ನಾಗೇಶ್ ಉಡುಪ, ಸಂತೋಷ್, ದಿನೇಶ್, ಶಿವರಾಯ, ದಿವಾಕರ ಶರ್ಮ, ರಘುರಾಮ, ಸತ್ಯವತಿ, ರಿಯಾಜ್, ಶ್ರೀಧರ್, ಅಶೋಕ್ ದಾಳಿಯಲ್ಲಿ ಪಾಲ್ಗೊಂಡಿದ್ದರು. 

1 ಕೋಟಿ ರೂ.ಗೂ ಹೆಚ್ಚು ಅಕ್ರಮ ಆಸ್ತಿ ಸಂಪಾದನೆ: ಶೋಧದ ವೇಳೆ 1.80 ಲಕ್ಷ ರೂ. ನಗದು, 500 ಗ್ರಾಂ ಬೆಳ್ಳಿ, 430 ಗ್ರಾಂ ಚಿನ್ನ, ಬೆಲೆಬಾಳುವ ಅತ್ಯಮೂಲ್ಯ ಹಲವು ದಾಖಲೆ ಪತ್ರ ದೊರಕಿವೆ. ಇದೇ ವೇಳೆಯಲ್ಲಿ ಉಡುಪಿಯಲ್ಲಿನ ಅವರ ಕಚೇರಿಗೂ ದಾಳಿ ನಡೆಸಿ ಅಲ್ಲಿಯೂ ಹಲವು ದಾಖಲೆಪತ್ರ ವಶಪಡಿಸಿಕೊಂಡಿದ್ದೇವೆ. ಮಗನ ಹೆಸರಿನಲ್ಲಿ ಬೆಲೆಬಾಳುವ 3 ಬೋಟ್‌ಗಳಿವೆ. ಭವ್ಯ ಮನೆ ನಿರ್ಮಿಸಿರುವ ಅಧಿಕಾರಿ ಈ ಬಗ್ಗೆ ಬ್ಯಾಂಕ್ ಸಾಲ ಪಡೆದುಕೊಂಡಿದ್ದು, ಅದರ ದಾಖಲೆಪತ್ರವನ್ನು ಸಹ ಪಡೆದುಕೊಂಡಿದ್ದೇವೆ. ಅಂದಾಜು ಒಂದು ಕೋಟಿ ರೂ.ಗೂ ಹೆಚ್ಚಿನ ಅಕ್ರಮ ಸಂಪಾದನೆ ಮಾಡಿರುವುದು ಮೇಲ್ನೋಟಕ್ಕೆ ಕಂಡುಬಂದಿದೆ. ತನಿಖೆ ಮುಂದುವರಿದಿದೆ ಎಂದು ಲೋಕಾಯುಕ್ತ ಎಸ್ಪಿ ವೇದಮೂರ್ತಿ ವಿಜಯ ಕರ್ನಾಟಕಕ್ಕೆ ತಿಳಿಸಿದ್ದಾರೆ. 

ಎನ್.ಎನ್. ಖಾರ್ವಿ ಬೆಂಗಳೂರಿನಲ್ಲಿ: ತುರ್ತು ಕೆಲಸದ ನಿಮಿತ್ತ 3 ದಿನಗಳ ಹಿಂದೆಯೇ ಎನ್.ಎನ್. ಖಾರ್ವಿ ಬೆಂಗಳೂರಿಗೆ ತೆರಳಿದ್ದು, ಲೋಕಾಯಕ್ತ ದಿಢೀರ್ ದಾಳಿಯಿಂದ ಮನೆಯ ಸದಸ್ಯರು ಕಂಗೆಟ್ಟಿದ್ದರು. ದಾಳಿಯ ಕುರಿತು ಅವರು ಪ್ರತಿಕ್ರಿಯೆ ನೀಡಲು ಬಯಸಲಿಲ್ಲ.
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com