ಬಂದರು ಇಲಾಖಾಧಿಕಾರಿ ಲೋಕಾಯುಕ್ತ ಬಲೆಗೆ

ಗಂಗೊಳ್ಳಿ : ಉಡುಪಿ ಲೋಕಾಯುಕ್ತ ಡಿವೈಎಸ್ಪಿ ಉಮೇಶ್ ಜಿ. ಶೇಟ್ ನೇತೃತ್ವದ ತಂಡ ಶುಕ್ರವಾರ ಗಂಗೊಳ್ಳಿ ಬಂದರು ಮತ್ತು ಒಳನಾಡು ಜಲಸಾರಿಗೆ ಇಲಾಖೆ ಕಚೇರಿಗೆ ಹಠಾತ್ ದಾಳಿ ನಡೆಸಿ ಬೋಟ್ ಪರವಾನಗಿಗೋಸ್ಕರ ಲಂಚ ಸ್ವೀಕರಿಸುತ್ತಿದ್ದ ಇಲಾಖೆಯ ಸಹಾಯಕ ಸಂರಕ್ಷಣಾಧಿಕಾರಿ ಕಿಶೋರ್ ಮಾಡ ಎಂಬವರನ್ನು ಬಂಧಿಸಿದೆ. 39,710 ರೂ. ಲಂಚ ಸ್ವೀಕರಿಸಿದ್ದ ಸಂದರ್ಭ ಅವರನ್ನು ಬಂಧಿಸಲಾಗಿದ್ದು, ಹಣ ಸ್ವಾಧೀನಪಡಿಸಿಕೊಳ್ಳಲಾಗಿದೆ. 

ಘಟನೆ ವಿವರ: ಗಂಗೊಳ್ಳಿ ಬಂದರು ಕಚೇರಿ ಸಹಾಯಕ ಸಂರಕ್ಷಣಾಧಿಕಾರಿ ಬೋಟ್ ಪರವಾನಗಿ ಮತ್ತು ನವೀಕರಣಕ್ಕಾಗಿ ಲಂಚ ಪಡೆಯುತ್ತಿದ್ದಾರೆ ಎಂಬ ಸಾರ್ವಜನಿಕ ದೂರಿನ ಹಿನ್ನೆಲೆಯಲ್ಲಿ ಒಂದು ತಿಂಗಳಿನಿಂದ ಲೋಕಾಯುಕ್ತ ಪೊಲೀಸ್ ಅಧಿಕಾರಿಗಳು ಪರಿಶೀಲನೆ ನಡೆಸುತ್ತಿದ್ದು ಶುಕ್ರವಾರ ಮಧ್ಯಾಹ್ನ ವೇಳೆ ಕಚೇರಿಗೆ ಖುದ್ದು ತೆರಳಿದ್ದರು. 

ಈ ಸಂದರ್ಭ ಕಚೇರಿಯಿಂದ ಬೋಟ್ ಮಾಲೀಕರೊಬ್ಬರು ಹೊರಬರುತ್ತಿದ್ದು ಅವರಲ್ಲಿ ಅಧಿಕಾರಿಗಳ ತಂಡ ಬೋಟ್ ಪರವಾನಗಿ ನವೀಕರಣದ ವಿಚಾರವಾಗಿ ಮಾತನಾಡಿಸಿತ್ತು. ಈ ಸಂದರ್ಭ ಅವರು ಈಗಾಗಲೆ 9 ಸಾವಿರ ರೂ. ಕೊಟ್ಟಿದ್ದೇನೆ. ಇನ್ನೂ ನವೀಕರಣ ಆಗಿಲ್ಲ ಸರ್ ಎಂದಿದ್ದರು. ನಮಗೂ ಒಂದು ಪರವಾನಗಿ ಬೇಕಿತ್ತು, ಬಂದರು ಅಧಿಕಾರಿಯೊಂದಿಗೆ ಮಾತನಾಡಿಸಿ ಎಂದು ಲೋಕಾಯುಕ್ತ ಅಧಿಕಾರಿಗಳ ತಂಡ ಅವರಲ್ಲಿ ಭಿನ್ನವಿಸಿಕೊಂಡಿತ್ತು. ಬಂದವರು ಲೋಕಾಯುಕ್ತ ಅಧಿಕಾರಿಗಳು ಎಂಬ ಅರಿವು ಬೋಟ್ ಮಾಲೀಕನಿಗೂ ಇರಲಿಲ್ಲ. 

ಅವರು ಲೋಕಾಯುಕ್ತ ಅಧಿಕಾರಿಗಳನ್ನು ಬಂದರು ಇಲಾಖಾ ಕಚೇರಿಯ ಅಧಿಕಾರಿಯ ಚೇಂಬರ್‌ಗೆ ಕರೆದುಕೊಂಡು ಹೋಗಿ ಬೋಟ್ ಪರವಾನಗಿ ನವೀಕರಣಕ್ಕಾಗಿ ಇವರು ಬಂದಿರುವುದಾಗಿ ಅರುಹಿದರು. ಮಾಡಿಕೊಡೋಣ. ಇಂತಿಷ್ಟು ಆಗುತ್ತೆ ಎಂದಾಗ ತಕ್ಷಣ ಕಾರ್ಯಪ್ರವೃತ್ತರಾದ ಲೋಕಾಯುಕ್ತ ಉಡುಪಿ ಡಿವೈಎಸ್ಪಿ ಉಮೇಶ್ ಜಿ. ಶೇಟ್ ಮತ್ತು ಲೋಕಾಯುಕ್ತ ತಂಡ ಬಂದರು ಅಧಿಕಾರಿಯನ್ನು ವಶಕ್ಕೆ ಪಡೆದುಕೊಂಡಿತು. 

ಅಧಿಕಾರಿಯ ಮೊಬೈಲ್, ಇನ್ನಿತರ ಸಂಪರ್ಕ ಸಾಧನ ಕಡಿತಗೊಳಿಸಿ ಕಚೇರಿಯನ್ನು ಸಂಪೂರ್ಣ ಜಾಲಾಡಿದಾಗ ಒಟ್ಟು 39,710 ರೂ. ಪತ್ತೆಯಾಗಿದೆ. ಈ ಹಣದ ಬಗೆಗಿನ ಯಾವುದೇ ವಿವರಗಳು ಕಚೇರಿಯಲ್ಲಿ ಇರಲಿಲ್ಲ. ತಕ್ಷಣ ಬಂದರು ಇಲಾಖಾಧಿಕಾರಿ ಕಿಶೋರ್ ಮಾಡಾ ಅವರನ್ನು ವಶಕ್ಕೆ ತೆಗೆದುಕೊಂಡ ಲೋಕಾಯುಕ್ತ ಅಧಿಕಾರಿಗಳು ಭ್ರಷ್ಟಾಚಾರ ತಡೆ ಕಾಯಿದೆಯಡಿ ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಬಂಧಿತ ಅಧಿಕಾರಿಗೆ ನ್ಯಾಯಾಂಗ ಬಂಧನ ವಿಧಿಸಲಾಗಿದೆ. 

ಕಾರ್ಯಾಚರಣೆಯಲ್ಲಿ ಉಡುಪಿ ಲೋಕಾಯುಕ್ತ ಡಿವೈಎಸ್‌ಪಿ ಉಮೇಶ್ ಜಿ. ಶೇಟ್, ಪೊಲೀಸ್ ನೀರಿಕ್ಷಕರಾದ ಮೋಹನ ಕೊಟ್ಟಾರಿ, ಸಿಬ್ಬಂದಿಗಳಾದ ನಾಗೇಶ ಉಡುಪ, ರಘುರಾಮ, ಸತ್ಯವತಿ, ದಿವಾಕರ ಶೆಟ್ಟಿ, ಶ್ರೀಧರ ಜಿ., ರಿಯಾಜ್ ಅಹಮ್ಮದ್, ಅಶೋಕ, ಶಿವರಾಮ ಬಿಲ್ಲವ, ದಿನೇಶ್, ಲಕ್ಷ್ಮೀಧರ ಸೇದಿ ಪಾಲ್ಗೊಂಡಿದ್ದರು. 

12ರ ತನಕ ನ್ಯಾಯಾಂಗ ಬಂಧನ: ಲೋಕಾಯುಕ್ತ ಪೊಲೀಸರು ಕಿಶೋರ್ ಮಾಡಾ ಅವರನ್ನು ಶುಕ್ರವಾರ ಸಂಜೆ ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ಡಿ.12ರ ತನಕ ನ್ಯಾಯಾಂಗ ಬಂಧನ ವಿಧಿಸಿ ನ್ಯಾಯಾಲಯ ಆದೇಶಿಸಿದೆ.

ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com