ಲೋಕಾಯುಕ್ತ ದಾಳಿ: ವಿಶೇಷ ತಹಸೀಲ್ದಾರ್, ಸರ್ವೆಯರ್ ಬಂಧನ

ಬೈಂದೂರು: ಇಲ್ಲಿನ ವಿಶೇಷ ತಹಸೀಲ್ದಾರ್ ಕಚೇರಿಗೆ ಸೋಮವಾರ ಮಧ್ಯಾಹ್ನ 1ರ ಸುಮಾರಿಗೆ ಜಾಗದ ಪಹಣಿಪತ್ರ ಮಾಡಿಸಿಕೊಡುವ ವಿಚಾರದಲ್ಲಿ 4 ಸಾವಿರ ರೂ. ಲಂಚ ಸ್ವೀಕರಿಸುತ್ತಿದ್ದಾಗ ಲೋಕಾಯುಕ್ತ ಪೊಲೀಸರು ದಾಳಿ ನಡೆಸಿ ವಿಶೇಷ ತಹಸೀಲ್ದಾರ್ ಮಹಮ್ಮದ್ ಖಾನ್ ಹಾಗೂ ಸರ್ವೆಯರ್ ಕಲ್ಲೇಶ್‌ನನ್ನು ಬಂಧಿಸಿದ್ದಾರೆ. 

ಇಡೂರು ಕುಂಜ್ಞಾಡಿಯ ನಾಗರಾಜ ಶೆಟ್ಟಿ ಎಂಬುವವರು ತಮ್ಮ ಮನೆಯ ಜಾಗವನ್ನು ಮನೆಯವರಿಗೆ ಭಾಗ ಮಾಡಿ ಕೊಡುವ ಹಿನ್ನೆಲೆಯಲ್ಲಿ ಒಂದು ತಿಂಗಳ ಹಿಂದೆ ಪಾಲು ಪಟ್ಟಿ ಮಾಡಿ ಬೈಂದೂರಿನ ಸಬ್ ರಿಜಿಸ್ಟರ್ ಕಚೇರಿಯಲ್ಲಿ ರಿಜಿಸ್ಟರ್ ಮಾಡಿಸಿದ್ದರು. ಈ ಜಾಗದ ಪಹಣಿ ಪತ್ರ ಮಾಡಿಸಿಕೊಡಲು ಇಲ್ಲಿನ ವಿಶೇಷ ತಹಸೀಲ್ದಾರ್ ಮಹಮ್ಮದ್ ಖಾನ್ ನಾಲ್ಕು ಸಾವಿರ ರೂ. ಲಂಚ ನೀಡಬೇಕೆಂದು ತಿಳಿಸಿದ್ದಾರೆ ಎನ್ನಲಾಗಿದೆ. ಈ ವಿಷಯವಾಗಿ ನಾಗರಾಜ ಶೆಟ್ಟಿ ಒಂದು ತಿಂಗಳ ಹಿಂದೆ ಲೋಕಾಯುಕ್ತ ಪೊಲೀಸರಿಗೆ ದೂರು ನೀಡಿದ್ದರು ಎನ್ನಲಾಗಿದೆ. ದೂರು ನೀಡಿದ್ದರ ಬಗ್ಗೆ ಅನುಮಾನಗೊಂಡ ವಿಶೇಷ ತಹಸೀಲ್ದಾರ್ ಮಹಮ್ಮದ್ ಖಾನ್ ಲಂಚ ಸ್ವೀಕರಿಸಲು ಹಿಂದೇಟು ಹಾಕಿದ್ದರು. ಆದರೆ ಸರ್ವೇಯರ್ ಕಲ್ಲೇಶ್ ನಾನು ಹಣ ತೆಗೆಯಿಸಿ ಕೊಡುತ್ತೇನೆ ಎಂದು ವಿಶೇಷ ತಹಶೀಲ್ದಾರ್‌ಗೆ ತಿಳಿಸಿ ಸೋಮವಾರ ಮಧ್ಯಾಹ್ಷ 1ರ ಸುಮಾರಿಗೆ ಶಿರೂರಿನಲ್ಲಿ ನಾಗರಾಜ ಶೆಟ್ಟಿ ಅವರಿಂದ ಲಂಚ ಸ್ವೀಕರಿಸುತ್ತಿದ್ದಾಗ ಲೋಕಾಯುಕ್ತ ಇನ್‌ಸ್ಪೆಕ್ಟರ್ ಬಿ.ಪಿ. ದಿನೇಶ್ ಕುಮಾರ ಅವರ ನೇತೃತ್ವದಲ್ಲಿ ದಾಳಿ ನಡೆಸಿ ಸರ್ವೇಯರ್‌ನ್ನು ಅಲ್ಲಿಯೇ ಬಂಧೀಸಿ ಬೈಂದೂರಿನ ಪ್ರವಾಸಿ ಮಂದಿರಕ್ಕೆ ಕರೆತಂದರು. ಬಳಿಕ ವಿಶೇಷ ತಹಸೀಲ್ದಾರ್ ಮಹಮ್ಮದ್ ಖಾನ್ ಅವರನ್ನು ಇಲ್ಲಿನ ಪ್ರವಾಸಿ ಮಂದಿರದಲ್ಲಿ ಬಂಧಿಸಿ ವಿಚಾರಣೆ ನಡೆಸಿದರು. 
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com