ನಕಲಿ ಅಂಕಪಟ್ಟಿ: ಉಡುಪಿ ಜಿಲ್ಲೆಯಲ್ಲಿ 8 ಮಂದಿ ವಜಾ

ಉಡುಪಿ: ಜಿಲ್ಲೆಯಲ್ಲಿ ನಾಲ್ಕು ತಿಂಗಳ ಹಿಂದೆ 24 ಗ್ರಾಮ ಲೆಕ್ಕಿಗ ಹುದ್ದೆಗೆ ನಡೆದ ನೇಮಕ ವೇಳೆ 8 ಮಂದಿ ನಕಲಿ ಅಂಕ ಪಟ್ಟಿ ಸಲ್ಲಿಸಿದ್ದಾರೆ ಎಂದು ಜಿಲ್ಲಾಧಿಕಾರಿ ಡಾ. ಎಂ.ಟಿ. ರೇಜು ತಿಳಿಸಿದ್ದಾರೆ. 
      ಅವರು ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, 19 ಮಂದಿ ಸೇವೆಗೆ ಸೇರ್ಪಡೆಯಾದವರಲ್ಲಿ ಎಂಟು ಮಂದಿಯ ಅಂಕ ಪಟ್ಟಿ ನಕಲಿಯಾಗಿದ್ದು, ಇವರನ್ನು ಶನಿವಾರ ವಜಾಗೊಳಿಸಲಾಗುವುದು ಎಂದರು. 
      ಆರೋಪಿ ಗ್ರಾಮ ಲೆಕ್ಕಿಗರ ವಿರುದ್ಧ ಆಯಾ ತಾಲೂಕು ವ್ಯಾಪ್ತಿಯ ತಹಸೀಲ್ದಾರರಿಗೆ ಕ್ರಿಮಿನಲ್ ಕೇಸ್ ದಾಖಲಿಸುವಂತೆ ಸೂಚಿಸಲಾಗಿದೆ. ಆರು ಮಂದಿ ಸೇವೆಗೆ ಸೇರದಿದ್ದರೂ ಅವರ ಅಂಕಪಟ್ಟಿ ಪ್ರತಿ ಪರಿಶೀಲನೆ ಬಳಿಕ ನಕಲಿ ಅಂಕ ಪಟ್ಟಿ ಸಲ್ಲಿಸಿ ಆಯ್ಕೆಯಾಗಿರಬಹುದೆನ್ನುವ ಶಂಕೆ ವ್ಯಕ್ತವಾಗಿದೆ. ಇದರ ಹಿಂದೆ ನಕಲಿ ಅಂಕಪಟ್ಟಿ ಜಾಲವಿರಬಹುದು ಎಂದು ಹೇಳಿದರು. 
      ತಾಲೂಕುಗಳಲ್ಲಿ ಖಾಲಿ ಇರುವ 24 ಗ್ರಾಮ ಲೆಕ್ಕಿಗರ ಹುದ್ದೆಗೆ ನೇರ ನೇಮಕಾತಿಗೆ ಆನ್‌ಲೈನ್ ಮೂಲಕ ಅರ್ಜಿ ಸಲ್ಲಿಸಿದ 120 ಅಭ್ಯರ್ಥಿಗಳ ಪಟ್ಟಿಯನ್ನು 2013, ಜ. 21ರಂದು ಪ್ರಕಟಿಸಲಾಗಿತ್ತು. 
        ಜ. 29ರಂದು ಮೂಲ ದಾಖಲೆಗಳ ಪರಿಶೀಲನೆಗೆ 66 ಮಂದಿ ಹಾಜರಾಗಿದ್ದರು. ಮೆರಿಟ್, ಮೀಸಲು ಆಧಾರದಲ್ಲಿ 24 ಅಭ್ಯರ್ಥಿಗಳನ್ನು ಆಯ್ಕೆ ಮಾಡಿ ನೇಮಕ ಆದೇಶ ನೀಡಲಾಗಿತ್ತು. ಅಂಕ ಪಟ್ಟಿಗಳನ್ನು ಮರು ಪರಿಶೀಲನೆಗಾಗಿ ಪದವಿಪೂರ್ವ ಶಿಕ್ಷಣ ಇಲಾಖೆ ನಿರ್ದೇಶಕರಿಗೆ ಕಳುಹಿಸಲಾಗಿತ್ತು. 
      2013ರ ಜೂ. 26ರಂದು ಪ.ಪೂ. ಶಿಕ್ಷಣ ಇಲಾಖೆ ನಿರ್ದೇಶಕರು ಎಂಟು ಅಭ್ಯರ್ಥಿಗಳ ಅಂಕ ಪಟ್ಟಿ ನಕಲಿ ಎನ್ನುವುದನ್ನು ದೃಢೀಕರಿಸಿದ್ದರು ( ಇಲಾಖೆ ನೀಡಿಲ್ಲ) ಉಡುಪಿ ಜಿಲ್ಲಾಡಳಿತ 2010ರಲ್ಲಿ 66, 2011 ರಲ್ಲಿ 20, 2012ರಲ್ಲಿ 20 ಮಂದಿ ಗ್ರಾಮ ಲೆಕ್ಕಿಗರನ್ನು ನೇಮಿಸಿತ್ತು. 
       ಶೇ. 85ಕ್ಕಿಂತ ಹೆಚ್ಚಿನ ಅಂಕವುಳ್ಳವರನ್ನು ಮೀಸಲು ಆಧಾರದಲ್ಲಿ ಆಯ್ಕೆ ಮಾಡಿ ತರಬೇತಿ ನೀಡಲಾಗುತ್ತದೆ. ಆದರೆ ನೇಮಕಗೊಂಡವರ ಕನ್ನಡ ಬರಹ, ವ್ಯವಹಾರದ ಬಗ್ಗೆ ಸಂಶಯ ಬಂದ ಹಿನ್ನೆಲೆಯಲ್ಲಿ ಮೂಲ ಅಂಕ ಪಟ್ಟಿ ಪರಿಶೀಲಿಸಿದಾಗ ನಕಲಿ ಅಂಕಪಟ್ಟಿ ಹಗರಣ ಬೆಳಕಿಗೆ ಬಂದಿದೆ. 
        ಲೋಹಿತಾಶ್ವ ಎನ್ನುವಾತ ಮೊದಲೊಂದು ಅಂಕ ಪಟ್ಟಿ ಕೊಟ್ಟಿದ್ದು ಪರಿಶೀಲನೆ ಸಂದರ್ಭ ಮತ್ತೊಂದು ಅಂಕ ಪಟ್ಟಿ ಕೊಟ್ಟಿದ್ದಾನೆ. ಇವೆರಡೂ ನಕಲಿಯಾಗಿರಬಹುದು. ಆರೋಪಿಗಳು ಮಾರ್ಚ್-ಮೇ ತಿಂಗಳಲ್ಲಿ ಕರ್ತವ್ಯಕ್ಕೆ ಸೇರ್ಪಡೆಯಾಗಿದ್ದಾರೆ. 
     ಎರಡು ವರ್ಷಗಳ ಹಿಂದೆ ನೇಮಕವಾದ ಅಭ್ಯರ್ಥಿಗಳ ಅಂಕ ಪಟ್ಟಿ ಪರಿಶೀಲಿಸಿದ್ದು ಯಾವುದೇ ನಕಲಿ ಕಂಡು ಬಂದಿಲ್ಲ. ಐದು ವರ್ಷಗಳ ಹಿಂದಿನ ನೇಮಕದ ಬಗ್ಗೆ ತನಿಖೆ ನಡೆಸಲಾಗುವುದು. 
    ಆರೋಪಿಗಳಿಗೆ ವೇತನ ಪಾವತಿಸಿಲ್ಲ. ಎರಡು ವರ್ಷಗಳ ಪ್ರೊಬೇಷನರಿ ಅವಧಿಯಲ್ಲಿ ಮಾಸಿಕ 11,500 ರೂ. ವೇತನವಿದೆ ಎಂದರು. ಸುದ್ದಿಗೋಷ್ಠಿಯಲ್ಲಿ ಅಪರ ಜಿಲ್ಲಾಧಿಕಾರಿ ಕುಮಾರ್ ಉಪಸ್ಥಿತರಿದ್ದರು.


ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com