ಉಡುಪಿ ಜಿಲ್ಲೆಯಲ್ಲಿ 537 ಮಲೇರಿಯಾ ಪತ್ತೆ: ಹೊರಗಿನವರೇ ಹೆಚ್ಚು

ಉಡುಪಿ: ಉಡುಪಿ ಜಿಲ್ಲೆಯಲ್ಲಿ 2013ರಲ್ಲಿ 537 ಮಲೇರಿಯಾ ಪ್ರಕರಣ ಪತ್ತೆಯಾಗಿದ್ದು, ಅದರಲ್ಲಿ ಹೊರಗಿನಿಂದ ಬಂದ ವಲಸೆ ಕಾರ್ಮಿಕರೇ ಅಧಿಕ. ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ ಡಾ. ರಾಮಚಂದ್ರ ಬಾಯರಿ, ಜಿಲ್ಲಾ ರೋಗ ವಾಹಕನ ಆಶ್ರಿತ ರೋಗಗಳ ನಿಯಂತ್ರಣಾಧಿಕಾರಿ ಡಾ. ಅಶೋಕ್ ಶುಕ್ರವಾರ ಪತ್ರಿಕಾಗೋಷ್ಠಿಯಲ್ಲಿ ಈ ವಿಚಾರ ಬಹಿರಂಗ ಪಡಿಸಿದರು. 
       537 ಪ್ರಕರಣಗಳಲ್ಲಿ ಜಿಲ್ಲೆಯ ಪ್ರಾಥಮಿಕ ಆರೋಗ್ಯ ಕೇಂದ್ರ ವ್ಯಾಪ್ತಿಯಲ್ಲಿ 153, ನಗರ ಪ್ರದೇಶಗಳಲ್ಲಿ 94, ಹೊರಜಿಲ್ಲೆಗಳಿಂದ ಬಂದ ಕಾರ್ಮಿಕರಲ್ಲಿ 128, ಹೊರ ರಾಜ್ಯಗಳಿಂದ ಬಂದ ಕಾರ್ಮಿಕರಲ್ಲಿ 162 ಪ್ರಕರಣಗಳಾಗಿವೆ. 2012ರಲ್ಲಿ ಒಟ್ಟು 2217 ಪ್ರಕರಣಗಳು ಉಡುಪಿ ಜಿಲ್ಲೆಯಲ್ಲಿ ಪತ್ತೆಯಾಗಿದ್ದವು. ಅದರಲ್ಲಿ 358 ಪ್ರಾಥಮಿಕ ಆರೋಗ್ಯ ಕೇಂದ್ರ ವ್ಯಾಪ್ತಿ, 394 ಮಂದಿ ನಗರ ಪ್ರದೇಶ, ಹೊರ ಜಿಲ್ಲೆಯ ಕಾರ್ಮಿಕರಲ್ಲಿ 628 ಹಾಗೂ ಹೊರ ರಾಜ್ಯಗಳಿಂದ ಬಂದ ಕಾರ್ಮಿಕರಲ್ಲಿ 837 ಪ್ರಕರಣ ಪತ್ತೆಯಾಗಿತ್ತು ಎಂದು ಹೇಳಿದರು. 
      ಹೀಗೆ ವಲಸೆ ಕಾರ್ಮಿಕರಿಂದಲೇ ಅಧಿಕ ಬಂದಿದ್ದರೂ ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲೆ ಮಲೇರಿಯಾಕ್ಕೆ ಸಂಬಂಧಿಸಿದಂತೆ ರಾಜ್ಯ ಮತ್ತು ದೇಶ ಮಟ್ಟದಲ್ಲಿ ಗುರುತಿಸುವಂತಾಗಿದೆ. ರಾಜ್ಯದಲ್ಲಿ ಪತ್ತೆಯಾಗುವ ಪ್ರಕರಣಗಳಲ್ಲಿ ಶೇ.50ರಷ್ಟು ಈ ಎರಡು ಜಿಲ್ಲೆಗಳಲ್ಲಿ ಇರುವುದು ಅದಕ್ಕೆ ಕಾರಣ ಎಂದು ವಿವರಿಸಿದರು. 
       ಜಿಲ್ಲೆಯಲ್ಲಿ 30 ಡೆಂಗೆ ಪ್ರಕರಣಗಳು ಪತ್ತೆಯಾಗಿವೆ. ಉಡುಪಿ ತಾಲೂಕಿನಲ್ಲಿ 134, ಕುಂದಾಪುರದಲ್ಲಿ 44 ಹಾಗೂ ಕಾರ್ಕಳದಲ್ಲಿ 8 ಸಂಶಯಾಸ್ಪದ ಪ್ರಕರಣಗಳನ್ನು ರಕ್ತ ಪರೀಕ್ಷೆಗೆ ಕಳುಹಿಸಲಾಗಿದ್ದು, ಅದರಲ್ಲಿ ಉಡುಪಿಯಲ್ಲಿ 22, ಕುಂದಾಪುರದಲ್ಲಿ 8 ಪ್ರಕರಣಗಳು ಡೆಂಗೆ ಎಂಬುದು ಖಚಿತವಾಗಿದೆ. ಕಾರ್ಕಳದಲ್ಲಿ ಡೆಂಗೆ ಪತ್ತೆಯಾಗಿಲ್ಲ. ಜಿಲ್ಲೆಯಲ್ಲಿ ಈ ವರ್ಷ ಚಿಕೂನ್‌ಗುನ್ಯ ಒಂದು ಪ್ರಕರಣವೂ ದಾಖಲಾಗಿಲ್ಲ. ಒಂದು ಎಚ್1ಎನ್1 ಪ್ರಕರಣ ದಾಖಲಾಗಿದೆ ಎಂದು ಹೇಳಿದರು. 

ತಂಡ ರಚನೆ: ಮಳೆಗಾಲ ಆರಂಭವಾದ ಬಳಿಕ ಮಲೇರಿಯಾ, ಮೆದುಳು ಜ್ವರ, ಡೆಂಗೆ, ಎಚ್1ಎನ್1, ಇಲಿ ಜ್ವರ, ಚಿಕೂನ್‌ಗುನ್ಯಾ ಮತ್ತಿತರ ಜ್ವರಗಳು ಬರುವ ಸಾಧ್ಯತೆಗಳು ಹೆಚ್ಚಿರುತ್ತದೆ. ಅದಕ್ಕಾಗಿ ಆರೋಗ್ಯಾಧಿಕಾರಿಗಳ ನೇತೃತ್ವದಲ್ಲಿ ಕಿರಿಯ ಆರೋಗ್ಯ ಸಹಾಯಕರು, ಆಶಾ ಕಾರ್ಯಕರ್ತೆಯರು, ಅಂಗನವಾಡಿ ಕಾರ್ಯಕರ್ತೆಯರು, ಸ್ವಸಹಾಯ ಸಂಘಗಳನ್ನು ಒಳಗೊಂಡ ತಂಡ ರಚಿಸಲಾಗಿದೆ. ಜ್ವರ ಪ್ರಕರಣಗಳನ್ನು ಗುರುತಿಸುವುದು, ಸೊಳ್ಳೆ ಉತ್ಪತ್ತಿ ತಾಣ ನಾಶ ಮಾಡುವುದು, ಜನರಿಗೆ ಆರೋಗ್ಯ ಶಿಕ್ಷಣ ನೀಡುವುದು, ಪ್ರಕರಣ ಕಂಡು ಬಂದರೆ ಕೂಡಲೇ ಮೇಲಧಿಕಾರಿಗಳಿಗೆ ಮಾಹಿತಿ ರವಾನಿಸುವುದು, ಹತ್ತಿರದ ಆಸ್ಪತ್ರೆಗೆ ಸೇರಿಸಿ ಚಿಕಿತ್ಸೆ ಕೊಡಿಸುವ ಕೆಲಸ ಈ ತಂಡ ಮಾಡುತ್ತದೆ ಎಂದು ಹೇಳಿದರು. 
      ನಗರ ಪ್ರದೇಶಗಳಲ್ಲಿ ಖಾಸಗಿ ನರ್ಸಿಂಗ್ ಕಾಲೇಜು ವಿದ್ಯಾರ್ಥಿಗಳು, ಖಾಸಗಿ ಆಸ್ಪತ್ರೆ ವೈದ್ಯರ ನೆರವು ಪಡೆಯಲಾಗುತ್ತದೆ. ತಾಲೂಕು ಮಟ್ಟದಲ್ಲಿ ಮತ್ತು ಜಿಲ್ಲಾ ಮಟ್ಟದಲ್ಲಿ ಸಮಿತಿಗಳನ್ನು ನೇಮಕ ಮಾಡಲಾಗುತ್ತದೆ. ಕಟ್ಟಡ ನಿರ್ಮಾಣಕಾರರು ಸರಿಯಾಗಿ ಸ್ಪಂದಿಸಿದರೆ ಸಾಂಕ್ರಾಮಿಕ ರೋಗಗಳನ್ನು ನಿಯಂತ್ರಿಸುವುದು ಸುಲಭ. ಅದಕ್ಕಾಗಿ ಬಿಲ್ಡರ್ಸ್‌ಗಳನ್ನು ಕರೆದು ಮಾಹಿತಿ ನೀಡಲಾಗುತ್ತಿದೆ ಎಂದು ಹೇಳಿದರು. 

  • ಸೊಳ್ಳೆ ಹೆಚ್ಚು ಕಂಡು ಬಂದ ಕೂಡಲೇ ಸ್ಥಳೀಯಾಡಳಿತಕ್ಕೆ ತಿಳಿಸಿ ಹೊಗೆ ಹಾಕಿಸುತ್ತೇವೆ. ಯಾವಾಗೆಂದರೆ ಆವಾಗ ಹೊಗೆ ಹಾಕಿಸಿದರೆ ಸೊಳ್ಳೆ ನಾಶ ಮಾಡಲು ಹೋಗಿ ಆರೋಗ್ಯ ಹಾನಿ ಮಾಡಿಕೊಂಡಂತಾಗುತ್ತದೆ. ವೈದ್ಯರ ನಿಗಾದಲ್ಲಿ ಮುಂಜಾನೆ ಮತ್ತು ಮುಸ್ಸಂಜೆ ಮಾತ್ರ ಹೊಗೆ ಹಾಕಬೇಕು. ಮನೆಯ ಒಳಗೆ ಹೊಗೆ ಹಾಕಿದಾಗ ಅಲ್ಲಿನ ಜನರು ಒಂದು ಗಂಟೆ ಮನೆಯಿಂದ ದೂರ ಇರಲೇಬೇಕು. ಇಲ್ಲದೇ ಹೋದರೆ ಹೊಗೆ ಆರೋಗ್ಯವನ್ನು ಕೆಡಿಸಿಬಿಡುತ್ತದೆ. ಅಲ್ಲದೆ ಡೆಂಗೆ, ಚಿಕೂನ್‌ಗುನ್ಯಾ ತರುವ ಈಡಿಸ್ ಸೊಳ್ಳೆಗಳು ಹಗಲು ಹೊತ್ತು ಮಾತ್ರ ಕಚ್ಚುವುದರಿಂದ ಅವು ಹೊಗೆಗೆ ಸಿಗುವುದಿಲ್ಲ. ಮನೆ ಸುತ್ತಮುತ್ತ ಸ್ವಚ್ಛವಾಗಿ ಇಟ್ಟುಕೊಳ್ಳುವುದು, ನೀರು ಶೇಖರಣೆಯಾಗದಂತೆ ನೋಡಿಕೊಳ್ಳುವುದಷ್ಟೆ ಇದಕ್ಕೆ ಪರಿಹಾರ.  -ಡಾ. ರಾಮಚಂದ್ರ ಬಾಯರಿ, ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣಾಧಿಕಾರಿ


ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com