ಸಾಸ್ತಾನ: ಬಹುಕಾಲದ ಬೇಡಿಕೆಯಾಗಿದ್ದ ಸಾಸ್ತಾನ ಸಮೀಪದ ಕೋಡಿಕನ್ಯಾಣ ಜೆಟ್ಟಿ ಕಾಮಗಾರಿ ಬಹುತೇಕ ಮುಗಿದಿದ್ದು, ಮೇ ಅಂತ್ಯದೊಳಗೆ ಉದ್ಘಾಟನೆಗೆ ಸಿದ್ಧವಾಗಲಿದೆ. ಕೋಡಿಕನ್ಯಾಣದಲ್ಲಿ ಜೆಟ್ಟಿ ನಿರ್ಮಿಸಬೇಕೆಂಬ ಮೀನುಗಾರರ ಸುದೀರ್ಘ ಹೋರಾಟಕ್ಕೆ ಕೊನೆಗೂ ಜಯ ಸಿಕ್ಕಿದೆ. ಇಲ್ಲಿ ಜೆಟ್ಟಿ ನಿರ್ಮಾಣದಿಂದ ಸುಮಾರು 5 ಸಾವಿರಕ್ಕೂ ಅಧಿಕ ಮೀನುಗಾರರು ಬೋಟ್ ನಿಲುಗಡೆ ಸಮಸ್ಯೆಯಿಂದ ಮುಕ್ತರಾಗಿದ್ದಾರೆ.
ಕುಂದಾಪುರ ಶಾಸಕ ಹಾಲಾಡಿ ಶ್ರೀನಿವಾಸ ಶೆಟ್ಟಿ, ಮಾಜಿ ಶಾಸಕ ಹಾಗೂ ಹಾಲಿ ಸಂಸದ ಕೆ. ಜಯಪ್ರಕಾಶ್ ಹೆಗ್ಡೆ ಅವರು ಕೋಡಿ ಕನ್ಯಾಣದಲ್ಲಿ ಜೆಟ್ಟಿ ನಿರ್ಮಿಸುವ ಕುರಿತು ಸಾಕಷ್ಟು ಯತ್ನಿಸಿದ್ದರು. ಹೀಗಾಗಿ 3 ಕೋಟಿ ರೂ. ವೆಚ್ಚದಲ್ಲಿ ಜೆಟ್ಟಿ ಕಾಮಗಾರಿ ಭರದಿಂದ ಸಾಗಿ ಇದೀಗ ಅಂತಿಮ ಹಂತದಲ್ಲಿದೆ.
ಈ ಜೆಟ್ಟಿ 200 ಎಕರೆ ವಿಶಾಲ ಜಾಗ ಹೊಂದಿದ್ದು, 12ರಿಂದ 15 ಫೀಟ್‌ನಷ್ಟು ನೀರು ತುಂಬಿಕೊಂಡು ಟ್ರಾಲ್‌ಬೋಟ್, ಗಿಲ್‌ನೆಟ್‌ನಂತಹ ದೋಣಿಗಳಿಗೆ ಆಶ್ರಯ ತಾಣವಾಗಲಿದೆ. ಮಳೆಗಾಲ ಸಮೀಪಿಸುತ್ತಿರುವುದರಿಂದ ಹೆಚ್ಚಿನ ಬೋಟುಗಳು ಇಲ್ಲಿ ಆಶ್ರಯ ಪಡೆಯಲಿವೆ.
ಜೆಟ್ಟಿಯ ತಳಭಾಗದಲ್ಲಿರುವ ಹೂಳು ತೆಗೆಯುವ ಕಾರ್ಯ ನಿರಂತರವಾಗಿ ನಡೆಯುತ್ತಿದೆ. ರಾಷ್ಟ್ರೀಯ ಹೆದ್ದಾರಿಯೂ ಈ ಜೆಟ್ಟಿಗೆ ಸಮೀಪದಲ್ಲೇ ಇರುವ ಕಾರಣ ಮೀನುಗಾರರಿಗೂ ಹೆಚ್ಚು ಅನುಕೂಲವಾಗಲಿದೆ. ಮಲ್ಪೆಗೆ ಮಣೂರು, ಕೋಟ, ಕೋಡಿಕನ್ಯಾಣದ ಕಡೆಯಿಂದ ಮೀನುಗಾರಿಕೆಗೆ ತೆರಳುವವರು ಹತ್ತಾರು ಕಿಲೋ ಮೀಟರ್ ಸುತ್ತುವರಿದು ಮೀನುಗಾರಿಕೆಗೆ ತೆರಳುವ ಬದಲು ಮನೆ ಬಾಗಿಲಿನಲ್ಲೇ ಮೀನುಗಾರಿಕೆಗೆ ತೆರಳುವ ಅವಕಾಶ ದೊರೆತಿದೆ.
ಹೂಳು ತೆಗೆಯಬೇಕು: ಮಲ್ಪೆಯಿಂದ ಹಂಗಾರಕಟ್ಟೆಗೆ ಬಂದ ಬೋಟ್‌ಗಳು ಅಲ್ಲಿಂದ ಕೋಡಿ ಕನ್ಯಾಣಕ್ಕೆ ಬರುವ ಅಳಿವೆಯಲ್ಲಿ ಹೂಳು ತುಂಬಿದ್ದು, ಅದನ್ನು ತೆಗೆಯುವ ಕಾರ್ಯವಾಗಬೇಕು. ಜೆಟ್ಟಿ ಕಾಮಗಾರಿ ಗುತ್ತಿಗೆ ಪಡೆದ ಗುತ್ತಿಗೆದಾರರು 4 ದಿನಗಳ ವರೆಗೆ ಈ ಅಳಿವೆಯಲ್ಲಿ ತುಂಬಿದ ಹೂಳನ್ನು ತೆಗೆದರೂ ಅದರಿಂದ ಬೋಟ್‌ಗಳು ಜೆಟ್ಟಿಗೆ ಬರುವುದು ಕಷ್ಟ ಸಾಧ್ಯವಾಗಿದೆ. ಅಳಿವೆಯಲ್ಲಿ ತುಂಬಿದ ಹೂಳನ್ನು ಪೂರ್ಣ ಪ್ರಮಾಣದಲ್ಲಿ ತೆಗೆಯುವುದರ ಮೂಲಕ ಬೋಟ್‌ಗಳು ಒಳಬರಲು ಮತ್ತು ಹೊರಹೋಗಲು ಅನುಕೂಲ ಕಲ್ಪಿಸಬೇಕಾಗಿದೆ.
ಮುಂದೇನಾಗಬೇಕು?: ಮೀನುಗಾರರ ಅನುಕೂಲಕ್ಕಾಗಿ ಸುಂದರ ಜೆಟ್ಟಿ ನಿರ್ಮಾಣಗೊಂಡು ಉದ್ಘಾಟನೆಯ ಹಂತದಲ್ಲಿದ್ದರೂ ಕುಡಿಯುವ ನೀರಿನ ವ್ಯವಸ್ಥೆ, ಜೆಟ್ಟಿಯ ಸುತ್ತಮುತ್ತ ವಿದ್ಯುತ್‌ದೀಪ ಅಳವಡಿಕೆಯಾಗಬೇಕು. ಸುಮಾರು 300ರಿಂದ 400 ಬೋಟ್‌ಗಳು ಈ ಜೆಟ್ಟಿಗೆ ಬರುವುದರಿಂದ ಹಾಗೂ ರಾಷ್ಟ್ರೀಯ ಹೆದ್ದಾರಿ ಹತ್ತಿರವಿರುವುದರಿಂದ ಈ ಜೆಟ್ಟಿ ಬಂದರಾಗಿ ಪರಿವರ್ತನೆಯಾಗುವ ಅವಕಾಶವಿದೆ.
ಮೀನುಗಾರರಿಗೆ ಹೆಚ್ಚು ಅನುಕೂಲ ಒದಗಿಸುವ ಶೆಡ್, ಜತೆಗೊಂದು ಡೀಸೆಲ್ ಬಂಕ್ ನಿರ್ಮಾಣಗೊಳ್ಳಬೇಕು. ಜೆಟ್ಟಿಯ ಒಳಭಾಗದಲ್ಲಿ ಮಣ್ಣನ್ನು ತುಂಬಿಸಿ ಸಮತಟ್ಟುಗೊಳಿಸಿ ಮೀನುಗಾರರ ಸುಗಮ ಓಡಾಟಕ್ಕೆ ಅನುಕೂಲ ಕಲ್ಪಿಸಬೇಕು.
ಚಿತ್ರ ವರದಿ - ಚಂದ್ರಶೇಖರ್ ಬಿಜಾಡಿ
ಕುಂದಾಪ್ರ ಡಾಟ್ ಕಾಂ - editor@kundapra.com
