ಕುಂದಾಪುರ ಪುರಸಭೆ ಗದ್ದುಗೆ ಯಾರಿಗೆ?


ಕುಂದಾಪುರ: ವಿಧಾನಸಭೆ ಚುನಾವಣೆಯಲ್ಲಿ ಕಹಿ ಉಂಡ ಕಾಂಗ್ರೆಸ್ ಹಾಗೂ ಹಾಲಾಡಿ ಶ್ರೀನಿವಾಸ ಶೆಟ್ಟರ ಗೆಲುವಿನಿಂದ ಮರ್ಮಾಘಾತಗೊಂಡ ಬಿಜೆಪಿ ಅಸ್ತಿತ್ವ ಉಳಿಸಿಕೊಳ್ಳುವುದಕ್ಕಾಗಿ ಕುಂದಾಪುರ ಪುರಸಭೆ ಗದ್ದುಗೆ ಹಿಡಿಯಲು ತೆರೆಮರೆ ಕಸರತ್ತು ಆರಂಭಿಸಿವೆ. 
      ಕುಂದಾಪುರ ಪುರಸಭೆಯ 23 ಸ್ಥಾನಗಳ ಪೈಕಿ ಕಾಂಗ್ರೆಸ್-ಸಿಪಿಎಂ ಮೈತ್ರಿಕೂಟ 11 ಮತ್ತು ಬಿಜೆಪಿ 12 ಸ್ಥಾನ ಪಡೆದಿದೆ. ಕಾಂಗ್ರೆಸ್ ಕೂಟಕ್ಕೆ ಸಂಸದ ಜಯಪ್ರಕಾಶ್ ಹೆಗ್ಡೆ ಅವರ ಬಲವಿದ್ದು, ಸಮಾನ ಸ್ಥಾನದೊಂದಿಗೆ ಎರಡೂ ಪಕ್ಷಗಳಿಗೂ ಪುರಸಭೆ ಗದ್ದುಗೆ ಏರುವ ಅವಕಾಶ ಮುಕ್ತವಾಗಿದೆ. 
       ಇದರ ನಡುವೆ, ಶಾಸಕರಾಗಿರುವ ಹಾಲಾಡಿ ಅವರ ನಿಲುವು ಮತ್ತು ಬರಲಿರುವ ಮೀಸಲು ನಿರ್ಧಾರಕವಾಗಿದ್ದು, ಎಲ್ಲರ ಕಣ್ಣು ಅದರ ಮೇಲೆ ನೆಟ್ಟಿದೆ. 
      ಕಾಂಗ್ರೆಸ್-ಬಿಜೆಪಿ ಸಮಬಲ ಸಾಧಿಸಿದರೂ ಒಂದೊಮ್ಮೆ ಹಾಲಾಡಿ ಶ್ರೀನಿವಾಸ ಶೆಟ್ಟಿ ಬಿಜೆಪಿ ಪರವಾಗಿ ನಿಂತರೆ ಬಿಜೆಪಿ ಮೇಲುಗೈ ಸಾಧಿಸಲಿದೆ. ಆದರೆ, ಅಂಥ ಸಾಧ್ಯತೆಯನ್ನು ನಿರಾಕರಿಸಲು ಕಾಂಗ್ರೆಸ್ ತನಗೆ ಬೇಕಾದ ಮೀಸಲು ನಿಗದಿ ಮಾಡಲೂಬಹುದಾಗಿದೆ. 
      ಹಾಗಂತ, ಹಾಲಾಡಿ ಅವರು ಬಿಜೆಪಿ ಬೆಂಬಲಕ್ಕೆ ನಿಲ್ಲುತ್ತಾರಾ ಅನ್ನುವುದೂ ದೊಡ್ಡ ಪ್ರಶ್ನೆ. ಪುರಸಭೆಯ 12 ಬಿಜೆಪಿ ಸದಸ್ಯರ ಪೈಕಿ 7 ಮಂದಿ ಹಾಲಾಡಿ ಬಣದಲ್ಲಿ ಗುರುತಿಸಿಕೊಂಡಿದ್ದಾರೆ. ಮತ್ತು ಹಾಲಾಡಿ ಪರ ಚುನಾವಣೆಯಲ್ಲಿ ಬಹಿರಂಗವಾಗಿಯೇ ಪ್ರಚಾರ ನಡೆಸಿದ್ದಾರೆ. ಇದು ಬಿಜೆಪಿಯನ್ನು ಕೆರಳಿಸಿದೆ. ಒಂದು ಹಂತದಲ್ಲಿ ಪಕ್ಷದ ಚಿಹ್ನೆಯಡಿ ನಿಂತು ಪುರಸಭೆ ಸದಸ್ಯರಾಗಿ ಆಯ್ಕೆಯಾದವರು ಪಕ್ಷತ್ಯಜಿಸಿದವರ ಪರ ಕೆಲಸ ಮಾಡುವ ಮೂಲಕ ಪಕ್ಷವಿರೋಧಿ ಚಟುವಟಿಕೆ ನಡೆಸುತ್ತಿದ್ದು ಅವರನ್ನು ಉಚ್ಚಾಟಿಸುವುದಾಗಿ ಬಿಜೆಪಿ ಹೇಳಿತ್ತು. 
      ಹಾಗೊಂದು ವೇಳೆ ಉಚ್ಚಾಟಿಸಿದರೆ ಕಾಂಗ್ರೆಸ್ ದಾರಿ ಸುಲಭವಾದಂತಾಯಿತು. 
       ಆದರೆ ಬಿಜೆಪಿ ಸದ್ಯದ ಸ್ಥಿತಿಯಲ್ಲಿ ಯಾವ ಸದಸ್ಯನನ್ನೂ ಉಚ್ಚಾಟಿಸುವ ಸ್ಥಿತಿಯಲ್ಲಿಲ್ಲ. ಯಾಕೆಂದರೆ, ಉಚ್ಚಾಟಿಸಿದರೆ ಪಕ್ಷದ ಅಸ್ತಿತ್ವವೇ ಕಳೆದುಹೋಗುವ ಅಪಾಯವಿದೆ. ಹಾಗಾಗಿ, ಅದು ಹಾಲಾಡಿ ಬಣವನ್ನು ಒಲಿಸಿಕೊಂಡು ಉಳಿಸಿಕೊಳ್ಳಬೇಕು. ಜತೆಗೆ ಅವರು ಕೂಡ ಇದೊಂದು ಚುನಾವಣೆ ಮಾತ್ರ ಹೀಗೆ.. ಮುಂದೆ ನಾವೆಲ್ಲ ಬಿಜೆಪಿ ಅಂತ ವಾಗ್ದಾನವನ್ನೂ ಮಾಡಿದ್ದಾರೆ. 
        ಅದು ಬೆಂಬಲಿಗರ ಮಾತು.. ಆದರೆ, ಬಿಜೆಪಿ ಪುರಸಭೆ ಅಧಿಕಾರ ಪಡೆಯಲು ಹಾಲಾಡಿ ಶ್ರೀನಿವಾಸ ಶೆಟ್ಟಿ ಬೆಂಬಲ ನೀಡುತ್ತಾರಾ? ಅಥವಾ ಯಾವುದೇ ಪೂವಾಗ್ರಹವಿಲ್ಲದೆ ಕಾಂಗ್ರೆಸ್ ಸರಕಾರ ಮೀಸಲು ನಿಗದಿ ಮಾಡುತ್ತದಾ? ಇದು ಕುತೂಹಲ ಮೂಡಿಸಿದ ಪ್ರಶ್ನೆ. 

ಅವಕಾಶ ಸದ್ಬಳಕೆ 
     ಪುರಸಭೆಯಲ್ಲಿ ಅಧಿಕಾರ ಹಿಡಿಯುವ ಅವಕಾಶ ನಮಗಿದೆ. ಸಂಸದರ ಮತದಾನದ ಹಕ್ಕಿನೊಂದಿಗೆ ಪುರಸಭೆಯಲ್ಲಿ ಸಮಬಲ ಸಾಧಿಸಿದ್ದೇವೆ. ಗದ್ದುಗೆ ಹಿಡಿಯಲು ಪ್ರಯತ್ನ ನಡೆಸುತ್ತೇವೆ. - ಮಲ್ಯಾಡಿ ಶಿವರಾಮ ಶೆಟ್ಟಿ , ಕುಂದಾಪುರ ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ. 

ಮೀಸಲು ಅಂತಿಮ 
        ಎಲ್ಲದ್ದಕ್ಕೂ ಮೀಸಲು ಅಂತಿಮ. ಅಧ್ಯಕ್ಷ, ಉಪಾಧ್ಯಕ್ಷ ಮೀಸಲು ಯಾರ ಪರ ಬರುತ್ತದೊ ಅವರಿಗೆ ಅಧಿಕಾರ ನಡೆಸಲು ಅವಕಾಶ ಒದಗಿ ಬರಲಿದೆ. ಸರಕಾರ ರಚನೆಯ ಬಳಿಕ ನೋಡೋಣ. -ರಾಜೇಶ್ ಕಾವೇರಿ ಕುಂದಾಪುರ ಕ್ಷೇತ್ರ ಬಿಜೆಪಿ ಪ್ರಧಾನ ಕಾರ್ಯದರ್ಶಿ. 

 ಕಾದು ನೋಡೋಣ 
      ಉಚ್ಚಾಟಿಸುವುದಾಗಿ ಬಿಜೆಪಿ ಹೇಳುತ್ತಲೆ ಬಂದಿದೆ. ನಾವು ಯಾವುದೇ ಪಕ್ಷ ವಿರೋಧೀ ಚಟುವಟಿಕೆ ನಡೆಸಿಲ್ಲ. ಹಾಲಾಡಿಯವರಿಂದ ನಾವು ಪ್ರತಿನಿಧಿಗಳಾಗಿದ್ದೇವೆ. ಅವರ ಚುನಾವಣೆಯಲ್ಲಿ ಕೆಲಸ ಮಾಡಿ ಋಣ ತೀರಿಸಿದ್ದೇವೆ. ನಾವು 7 ಮಂದಿ ಸದಸ್ಯರು ಈ ತನಕ ಯಾವುದೇ ನಿರ್ಣಯಕ್ಕೆ ಬಂದಿಲ್ಲ. ಕಾದು ನೋಡೋಣ. ಬಿಜೆಪಿ ನಿಲುವು ಕಂಡು ಮುಂದಿನ ಹೆಜ್ಜೆ ಇಡಲಿದ್ದೇವೆ. -ವಿಜಯ ಎಸ್. ಪೂಜಾರಿ(ಹಾಲಾಡಿ ಪರ ಬಿಜೆಪಿ ಬೆಂಬಲಿತ ಸದಸ್ಯ)

-ಜಾನ್ ಡಿಸೋಜ ಕುಂದಾಪುರ


ಕುಂದಾಪ್ರ ಡಾಟ್ ಕಾಂ - editor@kundapra.com
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com