ಇಂದು ತಾಲೂಕಿನ 19 ಅಭ್ಯರ್ಥಿಗಳ ಭವಿಷ್ಯ ನಿರ್ಧಾರ

ಕುಂದಾಪುರ: ಉಡುಪಿ ಜಿಲ್ಲೆಯ ಐದು ವಿಧಾನಸಭೆ ಕ್ಷೇತ್ರಗಳ 'ಅಧಿಪತಿ' ಆಯ್ಕೆ ನಿಟ್ಟಿನಲ್ಲಿ ಮತದಾರ ಪ್ರಭು ನೀಡಿದ ತೀರ್ಪು ಮತ ಯಂತ್ರಗಳ ಮೂಲಕ ಇಂದು ಹೊರಬೀಳಲಿದೆ. 
      ಕುಂಜಿಬೆಟ್ಟಿನ ಟಿ.ಎ. ಪೈ ಆಂಗ್ಲ ಮಾಧ್ಯಮ ಪ್ರೌಢಶಾಲೆ(ಡಿಮಸ್ಟರಿಂಗ್ ಕೇಂದ್ರ)ಯಲ್ಲಿ ಬುಧವಾರ ಬೆಳಗ್ಗೆ 8ರಿಂದ ಮತ ಎಣಿಕೆ ಆರಂಭವಾಗಲಿದ್ದು, ಜಿಲ್ಲಾಡಳಿತ ಎಲ್ಲ ಪೂರ್ವ ಸಿದ್ಧತೆ ಮಾಡಿಕೊಂಡಿದೆ.
     ಭಾನುವಾರ ನಡೆದ ಚುನಾವಣೆಯಲ್ಲಿ 3,11,438 ಪುರುಷರು ಹಾಗೂ 3,54,206 ಮಹಿಳೆಯರ ಸಹಿತ ಒಟ್ಟು 6,65,644(ಶೇ. 76.18) ಮತದಾರರು ತಮ್ಮ ಹಕ್ಕು ಚಲಾಯಿಸಿದ್ದಾರೆ.
        ಉಡುಪಿ-7, ಕಾಪು-11, ಬೈಂದೂರು-13, ಕಾರ್ಕಳ-9 ಹಾಗೂ ಕುಂದಾಪುರದಲ್ಲಿ 6 ಅಭ್ಯರ್ಥಿಗಳು ತಮ್ಮ ಅದೃಷ್ಟ ಪಣಕ್ಕೊಡ್ಡಿದ್ದಾರೆ. ಇವರಲ್ಲಿ ಬರೋಬ್ಬರಿ 26 ಮಂದಿ ಪಕ್ಷೇತರರಾಗಿದ್ದಾರೆ.
       ಪ್ರತಿ ವಿಧಾನಸಭೆ ಕ್ಷೇತ್ರದ ಮತ ಎಣಿಕೆಗೆ 14+1 ಟೇಬಲ್ ಬಳಕೆಯಾಗಲಿದೆ. ಒಬ್ಬ ಸೂಪರ್‌ವೈಸರ್, ಒಬ್ಬ ಕೌಂಟಿಂಗ್ ಅಸಿಸ್ಟೆಂಟ್ ಹಾಗೂ ಮೈಕ್ರೋ ಅಬ್ಸರ್ವರ್ ಸಹಿತವಾಗಿ ಒಟ್ಟಾರೆ 400 ಸಿಬ್ಬಂದಿ ಮತ್ತು 200 ಪೊಲೀಸರನ್ನು ಮತ ಎಣಿಕೆ ಕರ್ತವ್ಯಕ್ಕೆ ನಿಯೋಜಿಸಲಾಗಿದೆ. 
      ಅಂಚೆ ಮತ ಪತ್ರಗಳ ಎಣಿಕೆ ಮೊದಲು ನಡೆಯಲಿದೆ. ಮತ ಎಣಿಕೆ ಕೇಂದ್ರದ 200 ಮೀ. ವ್ಯಾಪ್ತಿಯಲ್ಲಿ ನಿಷೇಧಾಜ್ಞೆ ವಿಧಿಸಿದ್ದು, ಯಾವುದೇ ಮೆರವಣಿಗೆ ನಡೆಸುವಂತಿಲ್ಲ. ಮದ್ಯದಂಗಡಿಗಳನ್ನೂ ಮುಚ್ಚಲಾಗಿದೆ.

ಕುಂದಾಪ್ರ ಡಾಟ್ ಕಾಂ - editor@kundapra.com
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com