ರಾಜ್ಯಮಟ್ಟದ ಕೊರಗರ ಸಾಂಸ್ಕೃತಿಕ ಉತ್ಸವ


ಬೈಂದೂರು: ಕೊರಗ ಜನಾಂಗದವರು ರಾಜ್ಯದ ಅತ್ಯಂತ ಹಿಂದುಳಿದ ಪರಿಶಿಷ್ಟ ಪಂಗಡಕ್ಕೆ ಸೇರಿದವರಾಗಿದ್ದು, ಶತ ಶತಮಾನಗಳಿಂದ ಸಮಾಜದ ತುಳಿತಕ್ಕೆ ಒಳಗಾದವರು, ಈ ಜನಾಂಗ ಅಸ್ಪೃಶ್ಯತೆಯ ಪೆಡಂಭೂತದಿಂದ ಶಿಕ್ಷಣದಿಂದ ವಂಚಿತರಾಗಿದ್ದಾರೆ. ಯಾವುದೇ ಸಮಾಜದ ವ್ಯಕ್ತಿ ಸಾಮಾಜಿಕವಾಗಿ ಮುಂದುವರಿಯಬೇಕಾದರೆ ಅವನಿಗೆ ಶಿಕ್ಷಣ ಅಗತ್ಯ ಎಂದು ಐಟಿಡಿಪಿ ಯೋಜನಾ ಸಮನ್ವಯಾಧಿಕಾರಿ ಉದಯ ಶೆಟ್ಟಿ ಹೇಳಿದರು. 
      ಬೈಂದೂರಿನ ಮಹಾತ್ಮ ಜ್ಯೋತಿ ಬಾಪುಲೆ ಕೊರಗರ ಯುವ ಕಲಾವೇದಿಕೆ ಇಲ್ಲಿನ ಗಾಂಧಿ ಮೈದಾನದಲ್ಲಿ ಆಯೋಜಿಸಿದ ಎರಡು ದಿನಗಳ ರಾಜ್ಯಮಟ್ಟದ ಕೊರಗರ ಸಾಂಸ್ಕೃತಿಕ ಯುವ ಉತ್ಸವ ಮತ್ತು ಕ್ರೀಡಾಕೂಟ ಉದ್ಘಾಟಿಸಿ ಮಾತನಾಡಿದರು. 
     ಸ್ವಾತಂತ್ರ್ಯ ಬಂದು 65 ವರ್ಷ ಕಳೆದರೂ ಕೊರಗರು ಉನ್ನತ ಶಿಕ್ಷಣ ಪಡೆಯುತ್ತಿರುವುದು ತೀರ ವಿರಳವಾಗಿರುವುದು ವಿಷಾದನೀಯ ಸಂಗತಿ. ಈ ಜನಾಂಗದ ಯುವಕ- ಯುವತಿಯರು ಉನ್ನತ ಶಿಕ್ಷಣದತ್ತ ಮುಖ ಮಾಡುವುದರ ಮೂಲಕ ಸಮಾಜ ಸಂಘಟಿತರಾಗಿ ಸರಕಾರದ ಸೌಲಭ್ಯವನ್ನು ಸದುಪಯೋಗಪಡಿಸಿಕೊಂಡಾಗ ಸಮಾಜದ ಮುಖ್ಯವಾಹಿನಿಗೆ ಬರಲು ಸಾಧ್ಯವಾಗುತ್ತದೆ ಎಂದರು. 
     ಯಡ್ತರೆ ಗ್ರಾ.ಪಂ. ಅಧ್ಯಕ್ಷೆ ರಾಧಾ ಪೂಜಾರಿ ಅಧ್ಯಕ್ಷತೆ ವಹಿಸಿದ್ದರು. ರಂಗಕರ್ಮಿ ಗಣೇಶ ಕಾರಂತ ಬೈಂದೂರು, ಬೈಂದೂರು ಹೋಬಳಿ ಕಸಾಪ ಅಧ್ಯಕ್ಷ ಡಾ. ಸುಬ್ರಹ್ಮಣ್ಯ ಭಟ್, ಮಂಜುನಾಥ ಡಿ. ಹೊನ್ನಾವರ ಉಪಸ್ಥಿತರಿದ್ದರು. 
      ಈ ಸಂದರ್ಭ ಸಮಾಜದ ಸಂಘಟನೆಗಾಗಿ ಹಿರಿಯ ಕೊರಗ ಮುಖಂಡ ಹಾಗೂ ಮಂಗಳೂರು ಕೊರಗ ಒಕ್ಕೂಟದ ಮಾಜಿ ಅಧ್ಯಕ್ಷ ಗೋಕುಲ್‌ದಾಸ್ ಮಂಗಳೂರು, ಶಿಕ್ಷಣ ಕ್ಷೇತ್ರದಲ್ಲಿ ಸಲ್ಲಿಸಿದ ಸೇವೆಗಾಗಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತ ಉಪನ್ಯಾಸಕ ಡಾ. ಬಾಬು ಹಾಗೂ ಸಾಂಸ್ಕೃತಿಕ ಕಲೆ ಹಾಗೂ ಕುಲ ಕಸುಬಿಗಾಗಿ ಬಿಜೂರಿನ ಕುಪ್ಪ ಚೀಕಾ ಕೊರಗ ಅವರಿಗೆ ಕೊರಗಶ್ರೀ ಪ್ರಶಸ್ತಿ ನೀಡಿ ಸನ್ಮಾನಿಸಲಾಯಿತು. 
     ಕಲಾ ವೇದಿಕೆಯ ಅಧ್ಯಕ್ಷ ವೈ. ಲಕ್ಷ್ಮಣ ಕೆ. ಕೊರಗ ಸ್ವಾಗತಿಸಿದರು. ರೇಖಾ ಕಾರ್ಯಕ್ರಮ ನಿರ್ವಹಿಸಿದರು. ಶೇಖರ ಮರವಂತೆ ವಂದಿಸಿದರು.


ಕುಂದಾಪ್ರ ಡಾಟ್ ಕಾಂ - editor@kundapra.com
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com