ಶಾಸ್ತ್ರೋಕ್ತವಾಗಿ ಹಸೆಮಣೆ ಏರಿದ ಹಸೆಮಣೆ ಏರಿದ 44 ಜೋಡಿಗಳು

ಗಂಗೊಳ್ಳಿ: ಬಹು ಸಂಸ್ಕೃತಿಯ ಸಮಾಜದಲ್ಲಿ ಬದುಕುತ್ತಿದ್ದ ನಾವು ನಾನಾ ಧರ್ಮದ ಆಚರಣೆ, ಸಂಪ್ರದಾಯ ರೀತಿನೀತಿ ಕಟ್ಟುಪಾಡುಗಳನ್ನು ಕಾಣುತ್ತಿದ್ದೇವೆ. ಇಂದು ದೇಶದ ಎಲ್ಲ ಭಾಗದಲ್ಲೂ ಕೋಮುವಾದ ಕ್ಯಾನ್ಸರ್‌ನಂತೆ ಕಾಡುತ್ತಿದೆ. ಇದಕ್ಕೆ ಕಾರಣ ಇಂದಿನ ಸಮಾಜದ ಜನರಲ್ಲಿ ಧಾರ್ಮಿಕ ಪ್ರಜ್ಞೆಯಿಲ್ಲ. ಬದಲಾಗಿ ಧರ್ಮಾಂಧತೆಯ ಧಾರ್ಮಿಕ ವಾದವಿದೆ. ಸೂಫಿ ಸಂತರು ಸೌಹಾರ್ದಯುತವಾಗಿ ಬದುಕಿದ ನೆಲ ಇದಾಗಿದ್ದು, ಅವರ ಕಾಲದಲ್ಲಿ ಯಾವುದೇ ಕೋಮುವಾದ ಇರಲಿಲ್ಲ. ಅವರು ಧಾರ್ಮಿಕ ಪ್ರಜ್ಞೆಯನ್ನು ಬೆಳೆಸಿಕೊಂಡವರು ಎಂದು ತೊಕ್ಕೊಟ್ಟು ಜುಮ್ಮಾ ಮಸೀದಿಯ ಖತೀಬ ಜನಾಬ್ ಮಹಮ್ಮದ್ ಕುಂಞ ಹೇಳಿದರು.
   ಇಲ್ಲಿನ ಎಸ್.ವಿ. ಪದವಿ ಪೂರ್ವ ಕಾಲೇಜು ಮೈದಾನದಲ್ಲಿ ಜರುಗಿದ ಸರ್ವಧರ್ಮ ಮಹಾ ಸಮ್ಮೇಳನ ಮತ್ತು ಉಚಿತ ಸಾಮೂಹಿಕ ವಿವಾಹ ಕಾರ್ಯಕ್ರಮದ ಧಾರ್ಮಿಕ ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿದರು.
     ಇಂದು ದೇಶದಲ್ಲಿ ಭಯೋತ್ಪಾದಕರನ್ನು ರಕ್ಷಿಸುವ ಕೆಲಸವಾಗುತ್ತಿದೆ. ದೇವಸ್ಥಾನದಲ್ಲಿ ಪೂಜೆ, ಮಸೀದಿಯಲ್ಲಿ ನಮಾಜ್ ಹಾಗೂ ಚರ್ಚ್‌ನಲ್ಲಿ ಆರಾಧನೆ ಮಾಡುವವರನ್ನು ಅನುಮಾನದಿಂದ ನೋಡಲಾಗುತ್ತಿದೆ ಎಂದ ಅವರು, ಮನುಷ್ಯನ ಮನಸ್ಸನ್ನು ಒಂದುಗೂಡಿಸುವ ಕೆಲಸ ದೇವಸ್ಥಾನ, ಮಸೀದಿ, ಚರ್ಚ್‌ಗಳಿಂದ ಆಗುತ್ತಿದ್ದು, 21 ನೇ ಶತಮಾನದಲ್ಲಿಯೂ ಭರವಸೆಯ ಶಾಂತಿ, ನೆಮ್ಮದಿ ನೀಡುವ ತಾಣ ಇದಾಗಿದೆ. ಧರ್ಮಗಳ ಬಗ್ಗೆ ಮುಕ್ತವಾಗಿ ಚರ್ಚಿಸುವ ವಾತಾವರಣ ಬರಬೇಕಾಗಿ ಎಂದರು.
      ಧಾರ್ಮಿಕ ಕಾರ್ಯಕ್ರಮ ಉದ್ಘಾಟಿಸಿದ ಉಡುಪಿಯ ಜ್ಯೋತಿಷಿ ವಿದ್ವಾನ್ ಕಬ್ಯಾಡಿ ಜಯರಾಮ್ ಆಚಾರ್ಯ ಮಾತನಾಡಿ, ಇಂದಿನ ಜೀವನ ಕ್ರಮ ಹಾಗೂ ಈ ಪ್ರಪಂಚದಲ್ಲಿ ಬದುಕುವಾಗ ಒಗ್ಗಟ್ಟಿನಲ್ಲಿ ಬಾಳುವುದು ಅನಿವಾರ್ಯ. ನಾವು ಮಕ್ಕಳಲ್ಲಿ ಸಮನ್ವಯತೆ ಹಾಗೂ ಧರ್ಮ ಸಹಿಷ್ಣುತೆಯನ್ನು ಚಿಕ್ಕಂದಿನಿಂದಲೇ ಬೆಳಸಬೇಕು. ಪೋಷಕರಾದವರೂ ಈ ಬಗ್ಗೆ ಗಮನಹರಿಸಬೇಕು. ಒಳ್ಳೆಯದನ್ನು ಸ್ವೀಕರಿಸಿ ಕೆಟ್ಟದನ್ನು ತಿರಸ್ಕರಿಸಿ ಎಂಬ ಧ್ಯೇಯ ಹಾಗೂ ಮನಸ್ಸಿನಿಂದ ದೇಶದಲ್ಲಿ ನಾವೆಲ್ಲ ಒಂದಾಗಿ ಬದುಕಬೇಕು. ಇದರಿಂದ ದೇಶದ ಹಿತ ಹಾಗೂ ಲೋಕ ಕಲ್ಯಾಣ ಸಾಧ್ಯ. ವೈವಾಹಿಕ ಜೀವನಕ್ಕೆ ಕಾಲಿಡುತ್ತಿರುವ ಗಂಡು-ಹೆಣ್ಣಿಗೆ ಮದುವೆಯೆಂಬ ಈ ಬಂಧನದಲ್ಲಿ ಒಂದು ಉತ್ತಮ ಸಂದೇಶವಿದೆ. ಗಂಗೊಳ್ಳಿಯಲ್ಲಿ ಸರ್ವಧರ್ಮದವರು ಒಂದಾಗಿ ಇಂತಹ ಒಂದು ಕಾರ್ಯವನ್ನು ಹಮ್ಮಿಕೊಂಡಿರುವುದು ನಿಜಕ್ಕೂ ಶ್ಲಾಘನೀಯ ಎಂದರು.   
ಬೆಳಗಾವಿ ಧರ್ಮಪ್ರಾಂತ್ಯದ ಧರ್ಮಾಧ್ಯಕ್ಷ ಹಾಗೂ ಕರ್ನಾಟಕ ರಾಜ್ಯ ಕೆಥೋಲಿಕ್ ಸಾಮಾನ್ಯ ಸಭೆಯ ಅಧ್ಯಕ್ಷ ಅತಿ. ವಂ. ಬಿಷಪ್ ಪೀಟರ್ ಮಚಾದೊ ಮಾತನಾಡಿ, ಸಮಾಜದಲ್ಲಿ ನಾವೆಲ್ಲರೂ ಒಂದಾಗಿ ಬಾಳಿ ಬದುಕಬೇಕು. ಹಿಂದಿನ ಎಲ್ಲ ಕಹಿ ಘಟನೆಗಳನ್ನು ಮರೆತು ಮುಂಬರುವ ಜೀವನದಲ್ಲಿ ಸಹಬಾಳ್ವೆ ಹಾಗೂ ಪರಸ್ಪರ ಸ್ನೇಹದಿಂದ ಬಾಳುವ ಮೂಲಕ ಜೀವನದ ಸಿಹಿ ಉಣ್ಣಿರಿ ಎಂದು ಹಾರೈಸಿದರು.
         ಯುಎಇ ಪಾರ್ಚೂನ್ ಗ್ರೂಫ್ಸ್ ಆಫ್ ಹೋಟೆಲ್ಸ್ ಚೇರ್‌ಮನ್ ಪ್ರವೀಣ ಶೆಟ್ಟಿ ಅಧ್ಯಕ್ಷತೆ ವಹಿಸಿದ್ದರು. ಕಿರಿಮಂಜೇಶ್ವರ ಹಕ್ಕೇಬೈಲು ಮಹಮ್ಮದಿಯಾ ಜುಮ್ಮಾ ಮಸೀದಿ ಖತೀಬ ಜನಾಬ್ ಹಾಜಿ ಕೆ. ಇಸ್ಮಾಯಿಲ್ ಮುಸ್ಲಿಯಾರ್, ಉಡುಪಿ ಧರ್ಮಪ್ರಾಂತ್ಯದ ಅಂತರ್ ಧರ್ಮೀಯ ಸೌಹಾರ್ದ ಸಮೀತಿ ಸಂಚಾಲಕ ವಂ. ವಿಲಿಯಂ ಮಾರ್ಟಿಸ್, ಜನತಾ ಫಿಶ್ ಮೀಲ್ಸ್ ಮಾಲೀಕ ಆನಂದ ಸಿ. ಕುಂದರ್, ಗೋವಾ ಉದ್ಯಮಿ ನರಸಿಂಹ ಪೂಜಾರಿ, ದುಬೈ ಉದ್ಯಮಿ ಶೀನ ದೇವಾಡಿಗ, ಉಡುಪಿ ಜಿಲ್ಲಾ ಸಂಯುಕ್ತ ಜಮಾತ್ ಅಧ್ಯಕ್ಷ ಜನಾಬ್ ಹಾಜಿ ಎನ್. ಅಬ್ದುಲ್ಲ, ಗಂಗೊಳ್ಳಿ ಇಗರ್ಜಿ ಧರ್ಮಗುರು ವಂ. ಎ. ಡಿಲೀಮಾ, ಗಂಗೊಳ್ಳಿ ವಿರೇಶ್ವರ ದೇವಸ್ಥಾನದ ಪ್ರಧಾನ ಅರ್ಚಕ ಲಕ್ಷ್ಮೀನಾರಾಯಣ ಭಟ್, ಮುಂಬಯಿ ಉದ್ಯಮಿ ಎಂ. ಸುರೇಶ್ ಶೆಟ್ಟಿ, ಉಡುಪಿ ಡಯಾನ ಥಿಯೇಟರ್ ಗ್ರೂಫ್ ಚೇರ್‌ಮನ್ ರವೀಂದ್ರ ಎಂ. ಪೈ, ಉದ್ಯಮಿ ಕಾಂತು ಮಂಜುನಾಥ ಖಾರ್ವಿ, ಪ್ರಭಾಕರ ಉಗ್ರಾಣಿ, ವಿ.ಕೆ. ಮೋಹನ್, ಸುಬ್ರಹ್ಮಣ್ಯ ಶೆರಿಗಾರ, ಜಿ.ಎಂ. ರಫೀಕ್, ಗಂಗೊಳ್ಳಿಯ ಜನಾಬ್ ಖಲೀಫೆ ಯೂನುಸ್, ಕೆ. ಅಬ್ದುಲ್ ರೆಹಮಾನ್ ಉಪಸ್ಥಿತರಿದ್ದರು.
     ಈ ಸಂದರ್ಭ ಕ್ವಾಲಿಟಿ ಪುಡ್ಸ್, ಗೋವಾದ ಮಾಲೀಕ ಜನಾಬ್ ಎಂ.ಎಂ. ಇಬ್ರಾಹಿಂ ಹಾಗೂ ಗಾಂನ್ ಬೌಂಟಿ ಗೋವಾದ ನರಸಿಂಹ ಪೂಜಾರಿ ಅವರಿಗೆ ಹುಟ್ಟೂರ ಸನ್ಮಾನವನ್ನು ನೆರವೇರಿಸಲಾಯಿತು. ಕ್ವಾಲಿಟಿ ಪುಡ್ಸ್, ಗೋವಾದ ಮಾಲೀಕ ಜನಾಬ್ ಎಂ.ಎಂ. ಇಬ್ರಾಹಿಂ ಗಂಗೊಳ್ಳಿ 24*7ಗೆ ಆಂಬ್ಯುಲೆನ್ಸ್ ಕೀಲಿ ಕೈ ವಿತರಿಸಿದರು. ಸೌಹಾರ್ದ ವೇದಿಕೆ ಅಧ್ಯಕ್ಷ ಇಬ್ರಾಹಿಂ ಪ್ರಾಸ್ತಾವಿಕ ಮಾತನಾಡಿದರು. ತ್ರಾಸಿ ಕಲ್ಲಾನಿ ಹಿರಿಯ ಪ್ರಾಥಮಿಕ ಶಾಲೆಯ ವಿದ್ಯಾರ್ಥಿಗಳು ಸರ್ವಧರ್ಮ ಪ್ರಾರ್ಥನೆ ಮಾಡಿದರು.
       ವೇದಿಕೆಯ ಕಾರ್ಯದರ್ಶಿ ದಿವಾಕರ ಖಾರ್ವಿ ಸ್ವಾಗತಿಸಿದರು. ವಸಂತ ಕುಮಾರ, ನಾಗರತ್ನ ಶೇಟ್ ಹಾಗೂ ಶಾಲೆಟ್ ಲೋಬೋ ಕಾರ್ಯಕ್ರಮ ನಿರ್ವಹಿಸಿದರು. ತಾಜಿಮ್ ಗಂಗೊಳ್ಳಿ ವಂದಿಸಿದರು.

ಕುಂದಾಪ್ರ ಡಾಟ್ ಕಾಂ - editor@kundapra.com
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com