ಆನೆಗುಡ್ಡೆ ದೇವಳಕ್ಕೆ ಕನ್ನಡ ಚಿತ್ರರಂಗದ ರಾಜೇಂದ್ರ ಸಿಂಗ್ ಬಾಬು ಭೇಟಿ

ಕುಂದಾಪುರ: ಮೈಸೂರಿನಲ್ಲಿ ಚಿತ್ರರಂಗಕ್ಕೆ ಸಂಬಂಧಪಟ್ಟ ಯುನಿವರ್ಸಿಟಿ ತೆರೆಯಲು 10 ಎಕರೆ ಜಾಗ ನೀಡಿ ಎಂದು ಕಳೆದ ಒಂದು ದಶಕದಿಂದ ಹೋರಾಟ ನಡೆಸುತ್ತಲೇ ಬಂದಿದ್ದೇವೆ. ಈಗಾಗಲೇ ಈ ಬಗ್ಗೆ ಆಗಿ ಹೋಗಿರುವ ನಾಲ್ಕು ಮುಖ್ಯಮಂತ್ರಿಗಳಿಗೆ ಮನವಿ ಸಲ್ಲಿಸಿದ್ದೇವೆ. ಯುನಿವರ್ಸಿಟಿ ಮಟ್ಟದಲ್ಲಿ ಚಿತ್ರರಂಗಕ್ಕೆ ಸಂಬಂಧಿಸಿದ ಡಿಗ್ರಿ ಕೋರ್ಸ್ ಆರಂಭಿಸಿ ಎಂದು ಬೊಬ್ಬೆ ಹೊಡೆಯಲಾಗುತ್ತಿದ್ದರೂ ಸರಕಾರಕ್ಕೆ ಮಾತ್ರ ನಮ್ಮ ಧ್ವನಿ ಕೇಳಿಸುತ್ತಲೆ ಇಲ್ಲ ಎಂದು ಕನ್ನಡ ಚಿತ್ರರಂಗದ ಹಿರಿಯ ಚಿತ್ರನಿರ್ಮಾಪ ಕ, ನಿರ್ದೇಶಕ ಎಸ್.ವಿ. ರಾಜೇಂದ್ರಸಿಂಗ್ ಬಾಬು ಕಿಡಿ ಕಾಡಿದ್ದಾರೆ. 
     ಶನಿವಾರ ಕುಂಭಾಸಿ ಆನೆಗುಡ್ಡೆ ಶ್ರೀ ವಿನಾಯಕ ದೇವಸ್ಥಾನಕ್ಕೆ ಭೇಟಿ ನೀಡಿದ್ದ ಅವರು ಸುದ್ದಿಗಾರರೊಂದಿಗೆ ಮಾತನಾಡಿದರು. 
     ಕನ್ನಡ ಚಿತ್ರರಂಗಕ್ಕೊಂದು ಪ್ರತ್ಯೇಕ ವಿಶ್ವವಿದ್ಯಾಲಯದ ಅಗತ್ಯವಿದೆ. ಕಳೆದ 10 ವರ್ಷಗಳಲ್ಲಿ ಯುರೋಪ್, ಅಮೆರಿಕದಂತಹ ದೇಶ ಸುತ್ತಾಡಿ ಅಲ್ಲಿನ ಚಿತ್ರರಂಗದ ಬಗ್ಗೆ ಅಧ್ಯಯನ ನಡೆಸಿದ ಬಳಿಕ ಈ ಯೋಚನೆ ಮೂಡಿದೆ. ಆದರೆ ಯೋಚನೆ ಸಾಕಾರಗೊಳಿಸುವಂತಹ ಪ್ರೋತ್ಸಾಹ ಸರಕಾರದಿಂದ ಸಿಗುತ್ತಿಲ್ಲ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದರು. 
      ರಿಮೇಕ್ ಚಿತ್ರಗಳಿಗೆ ಪ್ರೋತ್ಸಾಹ ಸಲ್ಲ: ಸರ್ಕಾರ ರಿಮೇಕ್ ಚಿತ್ರಗಳಿಗೆ ಪ್ರೋತ್ಸಾಹ ನೀಡುವುದನ್ನು ನಿಲ್ಲಿಸಬೇಕು. ತಮಿಳು ಮತ್ತು ತೆಲುಗು ಭಾಷೆಗಳ ರಿಮೇಕ್ ಚಿತ್ರ ಮಾಡಿ ಇಡೀ ಚಿತ್ರರಂಗವನ್ನೇ ಗಬ್ಬೆಬ್ಬೆಸುವ ಕೆಲಸಗಳಾಗಿವೆ. ಇದರಿಂದ ನೆಜ ಕನ್ನಡದ ಕೆಲಸಗಾರರಿಗೆ ಅನ್ಯಾಯವಾಗಿದೆ. ನಮ್ಮವರಿಗೆ ನಾವು ಪ್ರೋತ್ಸಾಹಿಸುವ ಬದಲು ಹಳ್ಳಕ್ಕೆ ದೂಡುವ ಕೆಲಸ ಅಗುತ್ತಿದೆ. ಇದರಿಂದ ಕನ್ನಡತನ ಉಳಿಯಬೇಕಾದರೆ ಮೊದಲು ಸರ್ಕಾರ ರಿಮೇಕ್ ಚಿತ್ರಗಳಿಗೆ ಕಡಿವಾಣ ಹಾಕಬೇಕು. ಸಬ್ಸಿಡಿ ಮತ್ತು ತೆರಿಗೆಗಳ ವಿನಾಯಿತಿ ವಾಪಸ್ಸು ಪಡೆಯಬೇಕು. ಅದು ನೂರಕ್ಕೆ ನೂರು ಕನ್ನಡ ಚಿತ್ರವಾಗಿದ್ದರೆ, ಕನ್ನಡ ಕಾದಂಬರಿಗಳ ಆಧರಿತವಾಗಿದ್ದರೆ, ಅದರಲ್ಲೂ ಸಂಪೂರ್ಣ ಕನ್ನಡಿಗ ಕಾರ್ಮಿಕರಿದ್ದರೆ ಅಂತಹ ಚಿತ್ರಗಳನ್ನು ಹುಡುಕಿ ಸರ್ಕಾರ ಪ್ರೋತ್ಸಾಹಿಸಲಿ. ಅದನ್ನು ಬಿಟ್ಟು ಶ್ರೀಮಂತ ಚಿತ್ರರಂಗದವರನ್ನೇ ಬೆಳೆಸುವುದು ನಡೆಯುತ್ತಿರುವುದು ಖಂಡನೀಯ. ಫಿಲ್ಮ್ ಚೇಂಬರ್ ಸರ್ಕಾರದ ಒಂದು ಅಂಗವಾಗಿರುವುದಕ್ಕಿಂತಲೂ ಮುಖ್ಯವಾಗಿ ಪ್ರಾಮಾಣಿಕ ಕೇಂದ್ರವಾಗಿರಬೇಕು ಎಂದು ಅವರು ಅಭಿಪ್ರಾಯಪಟ್ಟರು. 

ಸಿಂಪಲ್ ಲವ್ ಸ್ಟೋರಿ ಗ್ರೇಟ್: ಇತ್ತೀಚೆಗಷ್ಟೇ ಬಿಡುಗಡೆಗೊಂಡಿರುವ ಸಿಂಪಿಲ್ ಲವ್ ಸ್ಟೋರಿ ಸಿನೆಮಾ ನಿಜಕ್ಕೂ ಗ್ರೇಟ್. ಹಿರಿಯ ನಿರ್ದೇಶಕರು ಸಹ ಹೌಹಾರುವಂತೆ ಸಿನೆಮಾ ಮೂಡಿಬಂದಿದೆ. ಈ ಭಾಗದ ನಟ ಉಪೇಂದ್ರ ಕನ್ನಡಕ್ಕಾಗಿ ಕೆಲಸ ಮಾಡುತ್ತಿರುವ ಅಪರೂಪದ ಕಲಾವಿದ ಎಂದು ಪ್ರಶಂಸಿದ ಅವರು ಕರಾವಳಿ ಪ್ರದೇಶದ ಕಂಬಳ ಕಲೆಯನ್ನು ಇಟ್ಟುಕೊಂಡು ಸಿನೆಮಾ ಮಾಡುವ ಕನಸು ಕಂಡಿದ್ದೇನೆ. ಗ್ರಾಮೀಣ ಪ್ರದೇಶದ ಕಲೆಯನ್ನು ಉಳಿಸಿ ಬೆಳೆಸಿ ಪ್ರೋತ್ಸಾಹಿಸುವುದರ ಜತೆಗೆ ನಮ್ಮತನ ತೋರಿಸಿ ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಟ್ಟದಲ್ಲಿ ಬೆಳೆಯುವ ಕೆಲಸ ಆಗಬೇಕು ಎಂದು ಅವರು ಹೇಳಿದರು. 

ರೆಬೆಲ್ ಚಿತ್ರ ಏಪ್ರಿಲ್‌ನಲ್ಲಿ ತೆರೆಗೆ: ಪುತ್ರ ಆದಿತ್ಯ ನಟಿಸಿರುವ ನನ್ನ ನಿರ್ದೇಶನದ ರೆಬೆಲ್ ಚಿತ್ರ ಏಪ್ರಿಲ್‌ನಲ್ಲಿ ತೆರೆಕಾಣಲಿದೆ. ಇನ್ನೊಂದು ಹೆಸರಿಡದ ಚಿತ್ರ ಜೂನ್‌ನಲ್ಲಿ ತೆರೆಗೆ ಬರಲಿದೆ. ಇಲ್ಲಿನ ಮರವಂತೆ ಪ್ರಪಂಚದ ಅದ್ಭುತ ತಾಣಗಳಲ್ಲಿ ಒಂದು. ಚಿತ್ರರಂಗಕ್ಕೆ ಹೋಲುವ ಪ್ರಾಕತಿಕ ಸೆಟ್ ಇದು. ಇಲ್ಲಿನ ಅದ್ಭುತ ದಶ್ಯವನ್ನು ಬೇರೆ ಬೇರೆ ಕೋನಗಳಲ್ಲಿ ಸೆರೆಹಿಡಿದು ತೋರಿಸಿದ ಕೀರ್ತಿ ಕನ್ನಡ ಚಿತ್ರರಂಗಕ್ಕೆ ಸಲ್ಲುತ್ತದೆ. ಕನ್ನಡ ಚಿತ್ರರಂಗದಲ್ಲಿ ತಂತ್ರಜ್ಞಾನ ಬೆಳೆಯುತ್ತಿದೆ. ತಂತ್ರಜ್ಞಾನದ ಜೊತೆಯಲ್ಲಿ ಕನ್ನಡ ಭಾಷಾ ಸಂಸ್ಕೃತಿಯ ಸೊಗಡು ಬೆಳೆಸುವುದು ಸಹ ನಮ್ಮ ಕರ್ತವ್ಯ ಆಗಬೇಕು ಎಂದು ಹೇಳಿದ ಅವರು ನನ್ನ ತಂದೆ ಆನೆಗುಡ್ಡೆ ವಿನಾಯಕನ ಭಕ್ತರು. ಆಗಾಗ್ಗೆ ಈ ಕ್ಷೇತ್ರಕ್ಕೆ ಬರುತ್ತಿರುತ್ತೇನೆ ಎಂದರು. 

ಕುಂದಾಪ್ರ ಡಾಟ್ ಕಾಂ - editor@kundapra.com
ಇತರೆ ಸುದ್ದಿಗಳು:


ಈ ಸುದ್ದಿಯನ್ನು Share ಮಾಡಿ :
 
© Copyright 2013-14 ಕುಂದಾಪ್ರ ಡಾಟ್ ಕಾಂ | ಅಫರಾದ-ಅಫಘಾತ ಸುದ್ದಿಗಳು All Rights Reserved.
Template Design by Herdiansyah Hamzah | Published by Kundapra Dot Com